Ka Voice of the People Party (VPP), East Jaiñtia Hills District da pynsñiaw ko yei pyrchah ya ka Shree Cement kawa em ha Daistong heiwa nadooh u MP warim u Dr. Ricky Syngkon leh dadep phah chithi u cha ka sorkar pyrdi wow pyndam noh ya kani ka karkhana u em ko.
Kawi na ki daw wa pyrchah toh wa kani ka karkhana ym pynmyntoi ko ya ki tre chnong tangwa daw myntoi du ki baar jylla kiwa wan khayi.
Da kdaw wa kani ka karkhana kawa ym pu em yoh ya ki kot ki sla wa biang da leh ko dei bor wow pam ya ki dieñ ki siej, u ah ya ki loom ki wah hanla da em i pyrchah da kiwa chong chnong ka Elaka Nongkhlieh tangwa ka sorkar da e laad bait ko wow leh ki katwa kwah ki yow pynsih pynjæd ya ka rymaw.
Da ong leh wa ki mar pohkhyndaw toh kiwa mantre da i tangwa ym yoh u tba ki deiwa chah kdoh ha ki aiñ wa boon deiwa ong wa joor chah ktah ka mariang.
Hajrong ini da kylli iwon wa ktah ware lada i tih moochuni næ i tih mooyong wei hei chem wa i tih moochuni toh iwa pynjæd ya ki loom ki wah, katwa u mooyong won ym em hanla em hi i ktah. Tangwa da u moochuni daw dooh lut ya ki loom ki wah.
Kamtæ da ong wa lada ka sorkar e laad ko kamni ya ki baar jylla wow leh ya kini ki jait khih wa ktah ya ka mariang katwa ya ki tre chnong won ym yoh laad ki kamwa jooh man, datoh por wow pyndam noh u e laad u wan kini ki karkhana Cement neibhah da em chwa 8-9 tylli.
“Lada ka sorkar ym e laad ko wow khih mooyong i, ym e laad leh ya kini ki karkhana u leh ki katwa kwah ki,” da ong u Damewanhi Rymbai, President VPP East Jaiñtia Hills.
Da pynbna leh wa daw pynman yei chong kyllaiñ myngngor ha ka 20 tarik nadooh 10 waje i step hadooh 5 waje i janmiet hajan u mot u Kiang Niangbah wa em ha Khliehriat ha pchem ka DC Office yow e leh yei pynche wa rap bniah.
Ha iwi won i liang da e leh yei kyrchaan ya ka JCMDA wow e por 3 bnai ya ka sorkar wow wai noh yei tih mooyong.
Discussion about this post