Ka sorkar u President Donald Trump ha United States da rai ko wow pyndam ya ka mukotduma pyrchah ya u heh spah na India, u Gautam Adani heiyatoh wa i kaam pynbaam poisa wa hadooh $ 265 Million wow thok ya ki bru na US wow yoh seiñ kreh Solar Energy ha India.
Ya kani ka mukotduma da pyndam da ka Department of Justice (DOJ) hadien wa kular u Adani wow pynlut hadooh $ 10 Billion wow seiñ kreh ha US.
Ka DOJ da phah ko leh ya ka chithi wow pyndam ya ka mukotduma cha u Judge Nicholas Garaufis ka US District Court ha Eastern District, New York.
Ya kani ka mukotduma da wanrah da ka DOJ heipor u President Joe Biden, heiwa da pynbaad ya u Adani wa thok u ya ki bru na USA wow thap poisa ki ha ki kreh.
“Kiwa chah pynbaad da pynbaam poisa ki ya ki heh sorkar ka India wow yoh ya ki kreh kiwa da ki Billion Dollars wei u Gautam S Adani, u Sagar R Adani wa u Vneet S Jaain da thok ki ya ki bru na USA wa na kiwi ki ri” da ong u Breon Peace, United States Attorney, Eastern District of New York heitu i por.
Ka Adani Green Energy da chah pynbaad ko wa pynbaam poisa ko wow thok ya ki bru wow thap poisa ki hei wow chna ya ka Solar Power Plant wa heh dooh ha India heiwa da yoh ki hadooh $3 Billion.
U Adani man u u bru wa em hei kyrdan 17 na kiwa mahajon dooh ki bru ka pyrthai heiwa da chongdor u $108 Billion katkam ka Bloomberg Billionaires Index, wei u muktiar yong oo, u Robert J Giuffra Jr, toh uwa yajan bha wa u President Donald Trump.
Discussion about this post