Ka Meghalaya Rural Bank ha ka 16 tarik uni u bnai da wai paidbah ko sa ya kawi ka chnat ha Namdong B, heiwa da wan wai ya ka da u Deputy Chief Minister, u Sniawbhalang Dhar deiwa emlang u Ashish Yadav uwa man u Chairman ka Meghalaya Rural Bank, u General Manager u Eleser Blah wa kiwi wei ya ka yalang da pynlai da u Mebanshan Wankhar, Regional Manager ka Bank.
Ha kani ka sngi da yoh i kyntien ngoohblai na u Fr. Simeon Sungoh, Parish Priest Namdong Parish hei emlang u Rev. Kamwakwah Laloo, Pastor In-charge ka Saitsama District.
Da yoh i klam pdiang burom na u Waheh Chnong ka Namdong B, u D.S. War uwa da sñiawngooh ya ki Waheh Raij, ki Secretary Raij, ki waheh chnong ka thaaiñ kiwa da kreh chtom neibynta wow wanrah ya kani ka chnat yeiwa da lai luti la kattu katni snem nadooh ka Synjuk Waheh Chnong 30 Chnong, ka 5 Chnong Development Society Namdong iwa nadooh u snem 2015.
U Sniawbhalang hawa e i klam da ong u wa ka chnong Namdong B em ko hapyrdi dooh ki chnong ka thaaiñ wei i em kani ka Bank daw pynsuk ko ya ki paidbah neibhah kamwa man katni ki yung krehkaam sorkar da em lut ki ha kani ka chnong wei kam u MLA em u i kitkhlieh ya i roi i paar.
Da kyntu u leh ya ki paidbah ka thaaiñ wow wai Account ha kani ka Bank khnang wa kani ka Bank u yoh nong ko wei u ye chooh ko u chakri ya ki paidbah ka thaaiñ.
Discussion about this post