Ha i janmiet ka 24 tarik kawa man leh ka sngi Sunday, ka kari yong u Pastor ka Balang Presbyterian Mawkhar, u Rev. Mcdonald Pyngrope, da chah tympiah ki yit ko heipor wa dang pynyieñ harood ka Wahumkhrah ha ka thaaiñ Lawmali Pyllun.
U Pastor Macdonald toh uwa da pynmih pyrthai yei pynemkaam bakla ya ka poisa yong ka Balang, wei ini i chah leh pynsih ka kari u da suba toh yow pynhiar tput yeiwa ujor u heiyatoh wa katai ka kaam poisa.
Neiliang u Pastor da booh ujor u ha Lumdiengjri Police Station. Wei da khana leh wa ka kari Bolero rong lieh u da chah tympiah ki yit ko katwa u Pastor dang em u ha ka yaseiñ yung ha Wahingdoh, wei da yoo u yeiwa jia ya ka kari manda poi u ha Jaïaw Pdeng.
Da khana wa ki bru damok da leh pynsih ki leh ya ka dwar kawa nadien ka Bolero wei da piah lut ka yit kawa neiliang timun, tangwa ym em chim næ rah ki ya ki tiar ki tar wa em hapoh kari wa kynthp ya ka snieh-poisa, ka Debit Card næ ka Tape kari.
Da pyntip leh wa ha katai ka thaw em kamwa 4-5 tylli ki kari, tangwa da mang du ya kani ka kari u Pastor Macdonald, iwa da pynsuba joor wa ye u man neidaw ka kynrum kynram poisa ka Balang.
Discussion about this post