Ha ka khubor wa da phah da u Saiñkupar Nongtraw, General Secretary ka HNLC, da kyntait yeiwa ong u President ka VPP, u Ardent Basaiawmoit uwa da maham yei pyrkhat yei rukom krehkaam ka KHADC deiwa pait neiliang ka niam.
Ka HNLC da ong ko wa ini ymtoh iwa khut wow man kiwa yatylli tangwa i pyrchang wow pynmylliñ yeiwa da leh ka VPP kawa yahkhmat ya ka KHADC pyrchah ya kiwa pait ya ka dustur riti (Traditional Indigenous Institution).
Ka HNLC da beiñ ko leh yei chah Suspend ya u Pa’iem Ainam Manik Syiem da ka KHADC deiwa thung won da u Alban Fedrick Syiem uwa man kam u Christan yow chimkti u kam u Acting Syiem. Wei ini toh ym ye de wow len heiwa u Syiem ka Niam Khasi da kyrriah yow thung da u Christan. Da ong leh wa kattæ da em i jooh i pyrchang wow leh yei jooh ha Hima Sohra.
Da kdaw leh wa u Pa’iem Ainam Manik Syiem toh u syiem wa soo wa chah Suspend ha ka KHADC deilang ka warim ka United Khasi Jaintia Hills Autonomous District Council. Da pynemkaam leh ya ka Section 7 kam u kuli yow pynyap yei bor ki Syiem.
Chooh chooh da ong wa ini ymtoh iwa thymme neibhah i chna ya ki District Council da u J.J.M. Nichols Roy uwa man kam u Christan wei uwa wanrah ya ka Church of God ha Khasi Hills, toh yow em ki bor kiwa na baar yow pynkhia ha ki Syiem kiwa boon toh kiwa dang bood ya ka Niam Tynre wei i rukom pynwandur ya ka KHADC ymtoh i kyrkhu ya ka jaitbru Ynñiawtrep.
Ka HNLC da ong ko wa da klam che ko wa kiwa yahkhmat ka VPP ym bien ki wow klam chaphang u Planet Syiem, uwa man kam uwa kam leh yei man Syiem neibhah uni toh uwa man kam u Christan wei da man i daw wa ka Executive Committee ka KHADC da dam chwa ko wow e Sanad cha u Maremdor Syiem. Wei kattæ u Planet Syiem da paan Certificate u na ka Seng Khasi yow pynyoo toh wa man u kam uwa bood ya ka Niam Tynre.
Ha iwi won i liang, ka HNLC da ong ko wa hawa pait ya ka Affidavit ka Election Commission, da yoo wa phær bak-la-bak hapyrdi i dur ka Voice of the People Party’s (VPP) wa ki kaam poisa poilaiñ kiwa yahkhmat ko. Heiwa u President ko, u Ardent Miller Basaiawmoit da yalap Election u deiwa pynyang borti deiwa paan ya ka poisa yarap na kiwa khih mylla, kiwa rep, tangwa oo won toh uwa chongdor ₹1,49,15,089.
Katkam ka 2023 Election Affidavit wa da booh ha ka Election Commission of India, iwa em u toh iwa chongdor ₹1,49,15,089 heiwa ki thaw ki bhaw toh kiwa chongdor ₹1,35,00,000 wa kynthup ya iwi i yung wa chongdor ₹1 klur ha Laitkor, Shillong wa i thaw wa chongdor ₹35 lak.
Em u leh ka Jeep, ka Bolero wa ka Royal Enfield Motorcycle kiwa chongdor waroh ₹6,70,000, i ksiar ₹1,92,500, ka Bank Deposit wa poisa ₹6,15,089.
Ka HNLC da ong ko leh wa heipor wa yalap Election, u Ardent Basaiawmoit da yoo oo wa pynyang borti u yow kyntu ya kiwa dooh wa duk wow kynchew ki katwa ye ki. Tangwa uni jooh u bru em u yei yung wa le mala wa chongdor ₹1 klur.
Da e nongmuna leh ya u MLA ka VPP na Mawryngkneng, u Heaving Stone Kharpran, heiwa oo leh da pynbna u wa chongdor u ₹1.09 klur iwa mut oo leh toh u Crorepati.
U Brightstarwell Marbaniang, MLA na Mawlai won da pynbna u wa chongdor u ₹41.85 lak, iwa mut da jan man Crorepati u.
Katwa u Adelbert Nongrum, MLA na North Shillong, won da pynbna u wa chongdor u ₹13.61 lak.
Ka HNLC da kylli ko wa kammon u Heaving Stone Kharpran u chongdor u palat ₹1 klur hawa man u kam uwa kreh sorkar uwa da chong-ngiah.
Kamtæ da kylli wa kammon ka VPP ong ko wa ka toh neibynta kiwa dooh, kreh ko neibynta kiwa dooh katwa kiwa yahkhmat ko toh du ki Crorepati?
Discussion about this post