U Montri ka sorkar jylla, u Wailadmiki Shylla uwa man leh u MLA ka Jowai na ka Party NPP hawa e i klam ha ka yalang paidbah neibynta u kyrtong MP Bye Election, u Dr. DRL Nonglait ha ka yalang wa da pynman ha Yungwalieh ka Chiliangraij, Jowai hei miet ka 25 tarik uni u bnai, da pynsñiaw u ya ki kaam wa ka sorkar MDA da leh ko hapoh i yahkhmat ka NPP nadooh kammon u wanrah yei suk i saaiñ, u wanrah yei roi i paar ha ki bynta waphær waphær lada toh hei tei i chna, ki laad yoh khih yoh kreh, ki laad wow kyrchaan ya ki paidbah wa kiwi.
Hei klam yong oo iwi wa ñiawliar bha u wei iwa sñiaw u toh ka mat wa ktah bha wei booh hei maa ya ka jaitbru nei em kiwa pynkhih ya ka mat Reservation Policy ha ki snem wa dadep khlem da sñiawthooh yei dien i khmat, heiwa da sakhi yei yakhih chah thngan neibynta ka Reservation Policy.
Da ong u wa neiliang ka sorkar lyngba i kyrpaad kiwa yakhih chah thngan da thung ko da ka Expert Committee yow pait bniah ya ka Reservation Policy.
“Kamwa jooh ong ka ktien ham pakhot moo haka ksiñ ngap lym sñiawthooh yei dien i khmat, wei dang em boon ki wym sñiawthooh yei ktah ka Reservation ha Khasi wa Jaiñtia,” da ong u Wailadmiki Shylla.
Ong haroh u toh neidaw wa pynkhih ya ka Reservation ha kitai ki por tæ wan noh ka Roster System hapoh Meghalaya heiyatoh wa i thung kreh, heiwa nachwa ym jooh em pynkrehkaam ya ka.
Nachwa lada em 100 tylli ki Post, 40% yoh ki Khasi Jaiñtia, 40% Garo, 15% General wa 5% kiwi won.
Ong u ha ki por nachwa ki Garo ym jooh ye ki u pynlut ya kani ka 40% heiwa da jooh thap bait da ki Khasi Jaiñtia yow pyndap ya ka bhah yong ki neibhah ki Khasi Jaiñtia toh kiwa rap ye u lehbha, tangwa nadooh wa krehkaam ka Roster ym yoh de ki ya ka bhah wym ye u pyndap ki Garo, heiwa da pynneh ha ki Garo hi yow rah won mynda khut thung kreh chakhmat.
Heiyatoh wa ini ong u kamwa man katni i dooh nong wa khroo toh ha ki Khasi Jaiñtia hi.
“Iyi wow jia lada mynstep mankawi kani ka mat u poi ko cha ka yung bichaar heiwa nachwa ki Khasi Jaiñtia wa Garo yoh i 80%, yi won wow bahkhlieh won lada kani ka 80% u hiar noh ko cha ka 50%, heiwa hadooh 50% u yoh noh da kiwi won ki jaitbru,” da kylli u Wailadmiki.
Ong u kani ka mat toh kawa ktah bha heiwa neiliang ka sorkar ym em chong kli kti ko wei hapoh Cabinet leh yatai yaklam ki dei sñiawthooh kammon u yaleh.
Wei ki dkhot ka Expert Committee leh da kreh chitom ki yei kaam da ki bnai ki bnai neibynta u bichaar bniah la em hi mo ki bynta wa ye u pynkylla.
Ha kani ka sngi da kynthah haroh u ya uwa yahkhmat ka VPP uwa man uwa pynkhih ya ka mat Reservation Policy, hajrong i kylla ktien yong oo wow yaklam yatai ya ka Reservation hapoh ka All Party Meeting yeiwa pna oo hi wa kwah, tangwa da e daw kylla u wa em ki kaam wa rap kongsan bar yeini.
“Kiwa kam kini mo kitæ kiwa yahkhmat wa manda poi i por u yaklam rap bniah jied ki u lai klam ha sarok bar yeiwa da ya pynbait u ya e yumutlang ha ka All Party Meeting,” ong u Wailadmiki.
Discussion about this post