Ka Joint Action Committee kawa kynthup ya ka East Jaintia Hills Truck Owner and Transporter Association (EJHTOTA) wa ya ka Jaintia Hills Truck Owners’ Association (JHTOA), ha u kyrwoh khubor wa da pynlait ynne ka sngi, da pynsñiaw ki yei sñiawkmen wei i sñiawngooh wa khroo hadooh kattæ kattæ ya ka sorkar jylla hajrong i ap i sñiaw wei i maap yong ka ya ka bai dan yong ki kari Truck kawa da sahteiñ nadooh i por yong ka kjut khlam COVID-19 kat hadooh kini ki sngi wa katni, ka wym ye de u su da ki tre Truck neidaw wym biang de i kamai kajih yong ki.
Kam wow pynkynmoo hajrong ini, ha ka 10 tarik u Thohlakhmi (Feb) yong uni u snem, ka JAC da lai yachem ko markhmat wa u Symbood Montri Rangbah ka sorkar Meghalaya, u Sniawbhalang Dhar chirup deilang wa ka dorkhat wow kyrpaad ya ka sorkar jylla u sñiaw wyrai ko deiwa maap noh ya katai ka bai dan yong ki Truck kawa da sahteiñ nadooh kitai ki por wa da kdaw haneiñ, heiwa neiliang yong u Sniawbhalang leh ha katai ka yachem da ap da sñiaw bha u yeini i eh i khoo yong ki tre Truck weiwa da kular haroh u wow rah ya kani ka mat yaklam wa ka sorkar jylla.
Chooh chooh hajrong ini i eh i khoo yong ki tre Truck, ka JAC ha ka 8 tarik uni u bnai da lai yachem biang ko sa chisien wa u Sniawbhalang heiwa da pynkynmoo wei da kyrpaad biang ko ya oo sa chisien wow yoo wyrai wow chimkhia u yeini i eh khoo yong ki tre Truck deiwa sñiawbha u yarap ya ki deiwa rap smat deiwa maap noh ya katai ka bai dan. Ha kani ka yachem kawa ar, u Symbood Montri Rangbah leh deiwa sñiawkhia yeini i eh i khor yong ki tre Truck, da kular biang u ya ka JAC wa ym slem de neini u rah noh u ya kani ka mat ha ka yalang yong ki Montri sorkar kawa daw pynman noh.
Kamtæ hadien itai i yachem wa ar yong ka JAC wa u Symbood Montri Rangbah, ka sorkar jylla ha ka Cabinet Meeting ynnin ka sngi da rai ko waw maap noh ya katai ka bai dan yong ki Truck, kitæ toh 90% ya ka Fitness Certificate wa 80% ya ka MV Tax wa ka Goods & Passenger Tax, weiwa heijooh i por leh yeini da pynbna wei wa da booh sngi wow su pyndep noh ya katai ka bai dan kawa dang hap u su hapoh ka 31 tarik u Naisaphra (Aug) yong uni u snem.
Neiliang u Deolangki Dkhar, Assistant Secretary ka JAC hawa klam hajrong ini i lehbha yong ka sorkar ya ki tre Truck, da ong u, “I neiliang yong ka JAC pynsñiaw i yei sñiawngooh iwa khroo hadooh kattæ kattæ ya u Symbood Montri Rangbah wa em burom ka jylla, u Sniawbhalang Dhar hajrong i wyrai yong oo deiwa chimkhia wei yarap yeini i eh i khoo yong i kam ki tre Truck deiwa maap ya kani ka bai dan kari yong i. Ini i yarap yong ka sorkar ya i man ko i kyrkhu wa khroo bha hadooh kattæ kattæ kyrpang ya i kam ka JAC wei kamjooh leh ya waroh hi-eh ha ka jylla Meghalaya kiwa booh Truck neibynta ka ja-kpoh yong i, weiwa yeini u kynmoo i ki neipor cheipor.”
Neiliang won u Biangshwa Shylla, Chairman ka JAC hawa pynrap hajrong kani ka jooh ka phang, da ong u, “Ka JAC pynsñiaw haroh u yei sñiawngooh wa khroo hadooh kattæ kattæ ya u Montri Rangbah wa em burom ka jylla, u Conrad K Sangma hajrong i ap i sñiaw wei i yarap yong ka sorkar ya i ki tre Truck deiwa maap noh ya kani ka bai dan ka wym ye de i u su hadooh ynne ka sngi. Yeini i kaam wa bha yong ka sorkar u kynmoo sñiawngooh i ki kam ki tre Truck lynter ki sngi.”
Heijooh i por ka kyrwoh na ka JAC chwa wow pynkut, da kyntu ya waroh ki dkhot yong ka JAC wow sñiawbha ki u chim ya kani kabu kawa bha tam heiwa u su pyndep noh ya waroh ki bai dan kari yong ki kiwa dang hap ki u su hadien wa da dep khatæ da maap da ka sorkar jylla.
Discussion about this post