Ka Centrepoint Group da beiñ joor ko yeiwa jia wa sñiawsih wei iwa da pynkhyrngiat mynsien yei wan psiah yabor, i ya mynsnaam wa i chah thombor iwa da jia ynne ka sngi ha chnong Laitkynsiew ha i thaw wa dang chna ya ka Resort yong ki.
Da khana wa heipor kamwa 2:45 i sngi, ki khynroo wa em kamwa 15 ngut kiwa da kam wa ki toh na ka KSU da wan psiah ki khlem da yoh bor cha kani ka thaw wa dang chna Resort wei da sdang ki wow maham wei thombor ya kiwa kreh wa em heini. Kini ki bru da wan ki da soo tylli ki kari.
Ha ini wa jia da em boon ngut kiwa kreh kiwa da mynsoo joor heiwa uwi uwa man kam u mistri uwa tip kam u Rajkumar Sharma da mynsoo joor u na khlieh wei kattæ da em u hei thaw sumaar ha Hospital.
Kiwi de kiwa da mynsoo toh u Manish Sharma, u Papu Sharma, u Mitlis Kumar wa u Sorjo Bhumij.
Da ong wa ka Centrepoint Group sñiaw sarong ko yei naam i pyrtuid yong kawa da bna naam ha kylleiñ ka ri lyngba i kreh chitom, i ya emlang wa ki paidbah wa i e kti lut ha ki kaam wa bha. Wei man ki leh kam kiwa e khih e kreh ha kiwa boon ki kaam wa da seiñ ki heiwa da em palat 680 ngut ki bru wa su tulop ki.
Wei ini wa jia chah thombor ym du kam i chah ktah yong kawi ka Business tangwa i tyngkheiñ yei hok ki paidbah wa chong chnong ka ri India, i hok wow im hei chngaaiñ, i yoh kaam, i burom wei yada hapoh ka aiñ.
Da ong leh wa ini i thombor ya kiwa ye wow e kreh khamtam hawa wan ki wow seiñ khih ha ki thaaiñ palatsor ka jylla man ko leh wow thombor yei ku i paar wa i angood ki paidbah ka Meghalaya.
Chooh chooh da ong wa ini wa jia da pyndooh burom wei ktah ko yei dur wa i mynried ka Meghalaya, daw pynsangeh ko yei wan kiwa seiñ khih wei daw pyntieñ ko leh yei wan kiwa kreh wei pyndooh laad ko leh yei heh i san ka jylla khamtam ha thaaiñ palatsor wa dang boon ki paidbah kiwa im hei dooh i duk wei kiwa emkaam joor yei yoh kreh.
Da pynkynmoo wa ki paidbah ka Meghalaya toh kiwa tip wow pynyatoh lok kiwa tip u pyrkhat jngai wei toh u kyntait ya ini i mynsnaam.
Kamtæ da kyrpaad ya ki bor sorkar wow leh smat deiwa eh pyrchah ya kini kiwa emkti wei wow pyntikna wa chngaaiñ kiwa kreh ha kiwa boon ki thaw wa em ha kylleiñ ka jylla.
Da kyrpaad leh ya waroh ki paidbah ka jylla wow mih chakhmat yow beiñ ya kam kini ki kaam thombor neibhah kini ki kaam ym du wa pynkslem yei roi i paar tangwa wei booh ko leh hei maa yei chngaaiñ ki yong i hi kiwa kreh wei puræ cha baar.
I pyntip na u Larsing Sawyan, Managing Director ka Centrepoint Group Enterprise.
Discussion about this post