U muktiar uwa na East Jaiñtia Hills uwa tip kam u Simpson Dkhar, da pynsñiaw u yei sñiawngooh wa khroo ya ka sorkar jylla kawa da ye u pynyoh yei angnood wa da slem bha yong ki paidbah ka thaaiñ deiwa daw sdang noh u kreh ya u sarok Sutnga-Saipung uwa da chah ieh chrah boon boon tylli ki snem.
U Simpson da e khublei kyrpang u ya ka sorkar MDA wa yahkhmat da ka NPP hapoh u Conrad K Sangma, u Sniawbhalang Dhar wa u Prestone Tynsong wa da chimkhia ki wow pynyoh u pynchna ya uni u sarok wa emkaam bha neibynta i myntoi yong ki paidbah ka thaaiñ waroh kawi.
Chooh chooh da e khublei kyrpang u ya ka MLA ka thaaiñ, ka Santa Mary Shylla wa da chimkhia ko wow rah ya kani ka phang ha yung dorbar wei ym kut du heitæ donhi, da yaleh chitom ko wow booddien neipor cheipor ya uni u sarok hadooh wa da yoh kamwa da angood ki paidbah.
Uni u sarok toh uwa da chah iehbeiñ ha kiwa mihkhmat man ka san snem uwi hadien uwi wei u sarok toh uwa sah rheng khlem da kylla khlem da pynchna.
Da ong chooh chooh wa uni u surok ym jooh em i por wa miat u kamwa la 14 snem tam. I sih u sarok booh ko hei eh ya kiwa rep wow pynpoi yei mar rep cha ki yaaw ki haat wei da ktah ko leh ya ki khynnah wa lai skur wa kiwa kjut wa chitom.
Kam u khon yong ka thaaiñ wa em i kitkhlieh yei bha yei miat, da booh u yei kyrpaad ya ka chnat PWD wa ya ki Contractor wow chna dei bha dei miat ya uni u sarok katkam ki kyndon yow man u kam ka juk wa katni khnang wow lait u surok u smat jæd.
Discussion about this post