Ki pulit ka Sohra da yoh ki wow kem ya ar ngut hajrong i chah dat kiwa kreh ha ka Resort wa dang chna ka Centre Point Group iwa em ha Laitkynsew iwa da jia ynnin ka sngi ha ka thaaiñ Sohra.
Kini ki ar ngut kiwa da chah kem toh kiwa tip pyrtuid kam u Lodes Khyllep wa u Dame Shullai, wei ki pulit ynne hi da lai rah ki ki cha ka yung bichaar ka Sub-Divisional Court ha Sohra, wei neiliang ka yung bichaar da phah kset ko 4 sngi ha Police Custody wei da pynngat ha 4 tylli ki kyndon.
Neiliang ka Khasi Students’ Union (KSU) South East Khasi Hills District hapoh i yahkhmat u Reebok Diengdoh uwa man u President ryngkat ki dkhot da lai ki wow synraan ya kiwa ha-yung ha-sem yong kitai ki ar ngut hadooh ha lait ka yung bichaar.
Ka Lahunmary Blah, President yong ka KSU Laitkynsew Unit hawa klam wa kiwa thoh khubor, da khana ko wa ha ka 28 tarik uni u bnai da lai kynreh ki ya ki kot ki sla yong kiwa kreh mylla kiwa na baar jylla ha katai ka Resort wei da synraan deilang ki chynrang. Da kyntait ko leh yei chah pynbaad wa da psiah yabor cha katai ka thaw khlem da yoh bor.
Chooh chooh da kyntait ko hajrong i chah pynbaad wa dat ya kiwa kreh deiwa ong wa ka seiñ ym emkti ko iyi iyi leh wei toh du i pharep donhi wei em kiwa chim kabu.
U Reebok Diengdoh da ong u wa i chah kem kini ki khynroo wym toh wa lai tooh lai leh ki ya ki kaam pynyap bru tangwa i chah kem toh hadien i chah pynbaad wei wow pyntieñ yei mynsien maya ri yong ki khynroo.
Discussion about this post