U Emlang Laloo uwa man kam u kyrtong ka Party Congress ha ka Election MLA ha u snem 2023, da sdang u wow pynlum pynlang ya kiwa kyrchaan yong oo neibynta wow yakhun biang ya ka Election MLA ha u snem 2028.
Yeini i pynbna wa daw yakhun Election biang da pyntip ha ka yalang paidbah wa da pynman ha ka yung wa sah u ha Saitsama, West Jaiñtia Hills kawa da pynman ynne ka sngi heiwa da pynkynmoo u ya ki paidbah wa da chong-ngiah u khlem da toh por deiwa chim da ka VRS nei kreh wa jooh man u kam u sahep ka chnat Soil & Water Conservation Department ka sorkar Meghalaya neibynta wow e kti ya idæ yow chakri paidbah.
Da e khublei u ya kiwa kyrchaan yong oo ha u snem 2023 hei yaleh pyrchah ya u Sniawbhalang Dhar heiwa da pynyoh ki ya oo hadooh 14,846 Vote kawa da man ka Vote kawa da jan poi chei jop, kamtæ da kyntu wei kyrpaad u ya kiwa kyrchaan yong oo wow neh chah ki wei wow kreh chitom ki neibhah i jop ym man de ko kawa eh ha kani ka sien wa ar hawa kheiñ wa sa du kajiak Vote da jop.
Kamtæ da em i kyrmen wa khroo wow jop ha ka Election MLA ha u snem 2028 wei da sñiaw tikna wa i jop da man bait i yong oo.
Da kyntu wei da sneiñ leh ya kiwa kyrchaan yong oo wym toh u chah pynbiej hei bor yong ka poisa wei ha kiwa pynleh maya jaitbru du neibynta wow myntoi samen tangwa wow yaichah ha oo kam u bru uwa em i thrang wow pynku ya ka thaaiñ wei neini chakhmat da kular u wow lai yooh kjat ha waroh ki chnong ki thaw yong ka Constituency neibynta wow paan yei kyrchaan hadooh wow jop emburom.
Heijooh i por da kyrpaad leh ya ki paidbah wa boon wow kyrchaan ya ka Congress ha kani ka Election MP chiteiñ samoi deiwa pynjop ya u kyrtong ka Party, u Vincent H Pala neibhah wa du ka Congress donhi kawa ye wow yaleh pyrchah ya ka BJP.
Discussion about this post