I dawa ki bru samen wa ki seiñ na Ri-loom Jaiñtia dang joor i na ka sorkar jylla wow wai noh yei tih mooyong katkam i juk stat.
Ka seiñ Jaiñtia Coal Owner Miners Supplier and Workers Association ynne ka sngi hawa yaklam wa kiwa thoh khubor ha Shillong, da dawa ki na ka sorkar wow wai noh yei tih mooyong ha Ri-loom Jaiñtia.
U Marshall S.B. Biam uwa man u President ka Association da ong u wa hanla ka Office u DC East Jaiñtia Hills ym em e bor ko wow pynman yakhih, tangwa ym mano ki yeitæ neibhah daw lai bait chakhmat ha ka 1 tarik u June wow toor cha ka yung krehkaam u DC wow pynman yakhih wa khlem booh por.
Da ong u wa kiwa mihkhmat ha Ri-loom Jaiñtia hawa poi i por Election yalap ki wow yoh biang u tih mooyong tangwa ini da man i du kam i kaam pynbiej Election donhi kattu la 12 snem.
U Marshall da kyrpaad wei da kyntu u ya ki seiñ wa ki paidbah wow kyrchaan yei yakhih wa khlem booh por neibhah ini ymtoh i wow yoh myntoi samen tangwa i wow myntoi ki paidbah warohlang.
Kam wow pynkynmoo wa kani ka seiñ ha uni u bnai da paan boor ko na u DC ka East Jaiñtia Hills wow pynman yei yakhih deiwa chah thngan khlem da booh por deiwa pynman ha pchem ka DC Office hajan u mot u Kiang Nangbah.
Discussion about this post