Ka All Meghalaya Tipper Owner & Supplier Association (AMTSOA) da yoh ko wow pynman ya ka yalang yow yaklam hajrong i eh i khoo kiwa yah wa khayi ya ki Truck Dumper (Tipper) ha ka 30 tarik uni u bnai ha Grandview Conference Hall wa em ha Soomer, West Jaiñtia Hills District heiwa kiwa boon ki tre kari Tipper da wan ki wow ya chimbynta.
Ha kani ka yalang da iwi i sur kam kiwa khayi wa ki tre Truck da rai ki wow ya krehlang wa ka sorkar yow ah noh yei pynjrong yei Body ki kari katkam ki kyndon ka aiñ wei da kyrpaad leh ya ka sorkar wow pynkrehkaam yeini i jooh neibynta waroh ki jait kari naddooh ki Truck, ki Tipper wa ki kari Tanker leh wei khamtam ya ki Truck yong ki Cement Factory wa toh u bood ki ya ki jooh ki kyndon yong ka ‘Standard Height Operation’ kiwa man kam ki kari kamai.
Neiliang ka AMTOSA da rai ko leh wow booh dei thoh cha ka sorkar hajrong ini wei daw pait siar ko leh wa kani ka aiñ u krehkaam ko ya waroh u ah ki yei Body wa da pyntam wei lada ym leh yeini, ki kam ki tre Tipper wa kiwa khayi ym bien ki wow ya krehlang wa ka sorkar.
Ka Association da kyrpaad ko leh ya waroh ki tre kari Tipper wow ya krehlang hajrong ini wei ha kani ka sngi da yoh leh wow yatai hajrong i yohlaad palat ki kari kiwa na baar wow wan kreh hapoh u pood u ang ka jylla yong i khlem da bood ya kiwa boon ki kyndon wei heiyatoh wa ini, ka AMTOSA da pynsñiaw ko leh kammon wow kdoh u khoom yeini wei daw phah leh dei thoh cha ki Company yow dawa leh heiyatoh wa i dor wa ki Company e ki cha kiwa khayi.
Chooh chooh ha kani ka sngi, ka seiñ da yoh ko leh wow pynthymme ya kiwa kitkaam ya kiwa haklieh dooh heiwa da jied ya u D. Wanmi Laloo kam u President wa u Becareful Suting kam u General Secretary.
Puræ leh: Phah ka sorkar jylla wow pynkylla biang ya ki kari kamwa man heipor wa thied | Da e por 60 sngi
Discussion about this post