Ha i wai paidbah ya ka Building thymme ka Rilang College wa em ha Mawsaw, South West Khasi Hills kawa da pynman ha ka 30 tarik uni u bnai, u Symbood Montri Rangbah ka jylla, u Sniawbhalang Dhar, da pynsñiaw u i kmen wa khroo wow yoh u embyntalang ha kani ka sngi wa kordor heiyatoh wa i puræ puthi.
Kamtæ kam i dak kyrchaan yei puræ puthi wa i angnood u pynku yei stat i tip ha ki thaaiñ palatsor da e yarap u leh Rs. 5 lak cha kani ka College.
Hawa klam ha kani ka sngi, neiliang u Sniawbhalang da pynsñiaw u yei chaniah ha kani ka College heiwa u man ko ka chlem wow tei ya ka mynried ki khynroo khyllood ka thaaiñ.
Ngait skem u leh wa na kani ka College daw mih chiboon kiwa stat wa chemphang ha ki laiñ puræ waphær waphær ki wow e i chakri ya ka imlang sahlang ha ka jylla wa ka ri hi waroh kawi.
Da e yaroh yaroh kyrpang u leh ya ka kur Iawphniaw kawa da e sñiawbha kamwa 5 Acre i thaw cha kani ka College khlem em iwon iwon i yooluti kylla. Ong haroh wa ini pynyoo ko yei em i mynsien chakri paidbah wa i e kti lut neibynta i myntoi hadooh ki pateiñ wow wan.
Heijooh i por yaroh u leh ya u MLA ka thaaiñ, u Renikton Lyngdoh Tongkhar, hajrong i kreh chitom u wow pynku yei puræ puthi wa i roi i paar ka Constituency, wei da ong u leh wa du dei ya krehlang hapyrdi ki chnong wa ki paidbah, daw ye u wanrah chooh chooh ki kaam pynroi yow myntoi ka imlang sahlang.
U Sniawbhalang da kyntu u leh ya ki khon khynroo khyllood u pynemkaam hok ki ya ki laad ki kabu wa da e ha ki, wei wow kreh chitom khnang yow ye ki u poi cha ki thong yong ki wei wow man leh kiwa pymwandur ya ka mynried wa tyrchaaiñ.
Discussion about this post