Ka KSU East Jaiñtia Hills District Unit ha ka 2 tarik uni u bnai da lai yachem ko ya u Deputy Commissioner ka East Jaiñtia Hills District wa u Executive Engineer (EE), MePDCL Moowakhu East Jaiñtia Hills hajrong i ku syndet syndet ka bai bordiñ neibynta ki paidbah kiwa haap hapoh ka Below Poverty Line (BPL).
Ka seiñ da ong ko wa ki paidbah wa boon da ood da naam ki neibhah wa da ktah yei rukom im wa man-ka-sngi khamtam ya ki khynnah skur wa ya waroh iwa emkaam ha yung neibhah i bordiñ ymtoh iwa man kyrpang tangwa iwa emkaam wa man kongsan tam ha kini ki sngi ki por.
Emkaam bordiñ yow che ka yung ka sem, i pynneh yei baam, kiwa pynemkaam Fan heipor wa chit, i pynkhreh baam wei e laad ko leh ya ki khynnah wow khreh kot hadien wa doom, da ong ka seiñ.
Ka seiñ da kyntu ko ya ka yung krehkaam u DC wa ya u EE wow chimkhia smat ki deiwa e buit leh wow maap yei su bai bordiñ ki manyung BPL neibynta ka 50 Unit kiwa nyngkong man-u-bnai. Wei yeini ye wow bichaar biang man-i-por deiwa chim yukheiñ namo ka Database BPL kawa em hapoh ka District.
Discussion about this post