Ha ka yalang ka Executive Committee yong ka Jaiñtia Coal Miners & Dealers Association (JCMDA) kawa da pynman ynne ka sngi da ya phyllu hajrong ki kaam kiwa ka seiñ lai luti ko hadien ka General Meeting wa Public Rally kawa da pynman ha ka 7 tarik u April, 2026.
Ha kani ka sngi da yoh leh wow e ya ka dorkhat cha u Montri Rangbah ka jylla lyngba u Deputy Commissioner ka East Jaiñtia Hills District.
Neiliang ka seiñ ha kini ki sngi dadep ko leh wow pynkhreh ya ka Draft Mining Plan katkam iwa da yaphyllu wa u Sniawbhalang Dhar, Deputy Chief Minister hawa yachem wa oo ha kamra krehkaam u.
Ka JCMDA dang yang ko leh ya kiwi ki seiñ kiwa khih mooyong na Khasi wa Garo Hills wow pyndep ki ya ka Draft Mining Plan yong ki yow ya kynthuplang hachwa wow lai e cha ki bor ka sorkar jylla.
Yow leh yeini dadp leh wow yachem wa ki sahep ka chnat DMR ha kamra krehkaam u Director ka Direcorate of Mineral Resources yow pynkhreh ya ka Mining Plan yow man ko katkam ka thaw wa em cha i.
Chooh chooh da pyntip leh wa dadep u chong Meeting ar sien wa ka State Forum kawa man ka seiñ kiwa khih mooyong kawa kynthuplang ya waroh ki seiñ khih mooyong hapoh ka jylla neibynta wow ya krehlang na Khasi, Jaiñtia wa Garo Hills wei ya ka Draft Mining Plan (Small Underground Scientific Mining Plan), neiliang ka JCMDA dadep ko wow e kti cha ka State Forum yow yoh u leh yeiwa emkaam wei hadien wa dep u bichaar bniah ya ka Draft Mining Plan na Khasi Hills wa Garo Hills daw chna ya ka Final Plan kawa man salonsar yow phah cha u Chief Minister ka sorkar jylla.
Da pynkynmoo leh wa dadep wow e ya ka dorkhat cha u CEM ka JHADC lyngba ka EJHC&MSA kawi ka seiñ wa ya krehlang wa ka JCMDA neibynta wow wai biang yei tih mooyong kam kawa em hei bor wow pait yei khyndaw u chyiap.
Ka JCMDA dadep e por ko leh ya ka sorkar hadooh 3 bnai yow leh yeiwa emkaam katkam i rai yong ki paidbah ha ka General Meeting wa Public Rally kawa daw kut ha 7 tarik u July, 2026.
Discussion about this post