U Robertjune Kharjahrin, uwa man kam u Vice President ka United Democratic Party, Central Executive Committee, ynne da phah u ya ka chithi wow ieh noh yei kaam wei wow mih noh napoh ka Party chisiendon.
Hawa e yei daw da ong u wa ha ki kaam Politics toh u em ki yurim wa skem wei kawa khooid hakhmat ki paidbah wei oo heipor wa em u hapoh ka UDP da yaleh u wow ksoh ya ka yurim ka Party wei wow yada yeiwa chaniah ki paidbah ka Meghalaya.
Tangwa da ong u wa i kyrchaan ki MLA ka UDP ya u kyrtong ka NPP, u James Sangma neibynta ka Election Rajya Sabha khlem da yoh yei mynjur ka CEC, da pynman ya oo wow sñiaw chah ktah wei ym chah de i mynsien u wow bood ya ka luti wa lai ka Party kattæ.
“Heipor wa ka UDP daw yaleh pyrchah ko ya ka NPP ha ka Election chiteiñ samoi neibynta ka MP Shillong Parliamentary Constituency deiwa paan yei kyrchaan ki paidbah kam ka Party kawa em ka luti wow yahkhmat, u kyrchaan won ya ka NPP neibynta ka Rajya Sabha man ko mar dei khangtleiñ wei kawa pynkulmar ha kawon ka yurim wa yieñ ka Party,” da ong u Robertjune.
Chooh chooh da ong u wa ha kawi ka liang ym ye wow ong ya ki paidbah wow kyntait ya ka NPP tangwa ha iwi won i liang u lai kyrchaan neidaw wa bha wa miat ha ki kaam Politics wei deiwa leh kamni daw pyndooh yei chaniah ki paidbah.
Kamtæ da ong u wa kam u bru wa klam yeiwa chim kabu ya ki kaam Politics wei uwa yieñ ha ka yurim wa skem, ym ye de u wow ksoh ya ka kyrdan kam uwa yahkhmat ka Party wei da hap noh u wow ieh noh yei kaam kam u Vice President.
Da pynsñiaw u leh yei sñiawngooh ya waroh kiwa kreh ka Party, kiwa kyrchaan hei lai luti u wei u pteiñ u wow kreh neibynta ki paidbah ka Meghalaya.
Discussion about this post