Ka Youth Social Welfare Pynthorlangtein (YSWP) deilang wa ka Education Committee yong ka Dorbar Chnong Pynthorlangtein, ka VPIC ka chnong, ka Meglife Thadlaskeiñ Block chirup wa ka Forest & Environment Department, West Jaiñtia Hills District da pynman ki yei lehkmen World Environment Day ynne ka sngi deiwa pynman kiwa boon ki jait ki kaam.
Da sdang deiwa pynman yalang ha Community Hall yong ka Dorbar Chnong Pynthorlangteiñ deiwa chimbynta da kiwa chong chnong, ki skur wa em hapoh chnong wa ki sahep yong ki Office kiwa da ya krehlang heiwa da yoh yei klam pynsñiawthooh yei emkaam wow pynneh pynsah ya ka bei rymaw.
Ya ka yalang da pynlai da u Emonlangki-oo Lipon, President YSWP wei da yoh yei klam hajrong ka phang da u Dr. Tyrchain Mitre Lipon, Waheh Chnong Pynthorlangtein. Da yoh leh yei klam hajrong i kordor yong ki dieñ ki siej na u Arminus C. Lipon, Head Teacher, Govt. L.P. School Pynthorlangteiñ wei pynbood da i klam na u Vanshan Buhphang, Region Manager, Meglife – heiyatoh wa i kitkhlieh kamjooh i kheiñkor ya ki dieñ ki siej yow wanrah i chait i nang yong ka bei rymaw kawa pynyoh ha i ya ka la’ær kamjooh ya ka um kawa khooid deiwa pynduna yei pynemkaam ya ki Plastic.
Neiliang u B. Japang, MFS, Assistant Forest Conservator, West Jaiñtia Hills District, uwa da e yei klam hajrong i emkaam u man ka bei rymaw kawa miat dur kamwa miat ki bru dei chimkhia nadooh ki khynnah hadooh ki waheh.
Neiliang yong u W. Shylla, DPM, Meglife, West Jaiñtia Hills District da ban joor u wa emkaam u sumaar ya ki dieñ wa da thung ynne ka sngi, wei ymhoi u kut du hei thung khlem da sumaar.
Da yoh ya i kyntien e khublei na u Womphyllanaki Lipon, Secretary YSWP.
Hadien ini da yoh yei pynkhooid ya ki Plastic kamjooh i thung dieñ hapoh u pood u ang yong ka chnong.
Da pynman leh ya ka Debate Competition hajrong phang: “Kham lah ka jingïada ïa ka mariang ban ïa ka spah ka phew” heiwa ha Govt. L.P. School da yoh ko hei kyrdan wa nyngkong pynbood sa ka Sport Club L.P. SSA hei kyrdan wa ar, katwa hei wa le da yoh ka U.P. School SSA Pynthorlangteiñ.
Da yoh leh u booh ya ki Dustbin hapoh chnong kiwa da e neiliang yong ka Baroda Bank Jowai kamjooh leh da kiwa e sñiawbha da kiwa chong dukan ka chnong.
Da pynkut ya kani ka sngi lehkmen pynneh mariang da ka yalehbol neibynta yong ki khynnah chynrang wa kynthai hapyrdi ki skur kiwa em hapoh chnong wa kiwa chong chnong hi waroh.
Discussion about this post