Ka JNC wa ka Dkhiah East Secondary School ynne da sngi da lehwarom ki ya ka World Environment Day ha Dkhiah East, East Jaiñtia Hills.
I thmu wa da pynskem da ka phang pyrdi ka pyrthai ha uni u snem toh kawa ong, “Inspired by Nature, for Climate, for our Future” wa ka phang symbood ka skur “Revive, rebuild through action”.
Ya kani ka lehwarom da pynlai da u Headmaster ka skur, u Dr. B. Nongtdu uwa da pdiang sñiawbha ya waroh kiwa chimbynta, deiwa booh yaka sur i bahkhlieh wow pynkrehkaam chakhmat neibynta ka mariang.
Kiwa emlang ha kani ka sngi toh ki dkhot ka SMC, kiwa sikai, ki khynnah skur wa u waheh chnong ka Dkhiah East, u P. Nongtdu.
Kiwa mihkhmat naka seiñ kynthup ki ya u President ka Khliehriat Circle, u Shanborlang Bamon, u Working President, u Diamon Bareh, u General Secretary, u Symboh Baiar Sumer wa ki dkhot deiwa emlang leh u General Secretary ka seiñbei u Wanshwa Suting kam u kongsan.
Ha kani ka sngi da pynman ya ka Drawing Competition yong ki khynnah skur, da yoh leh yei saam Prize cha kiwa jop da ka seiñ, wei da yoh leh i thung da kiwa boon ki dieñ soh waphær waphær kam ki kular neibynta mynstep mankawi wow pynneh pynsah ya ka mariang.
Ha i klam na u dkhot ka SMC, u Rafael Labon da pynsñiaw u yei khyrngiat ha kini i sngi kiwa da boon tylli ki karkhana wa i pynjæd yong ki ya ka mariang iwa da sakhi ha East Jaiñtia Hills.
Da ong u wa nadooh wa wan ka Industrial Revolution hapoh ka thaaiñ, da boon ki loom ki dieñ kiwa chah pam, wei kani da pynmih ko yei chit wa joor iwa da wanrah leh yei kylla ka suiñ bneiñ wa yeini da hap maad da ki khynnah kiwa kit yei ktah yong ka.
I klam iwa kham yillu da mih ki na u Wanshwa Suting uwa klam wow pynkhihwin ya kiwa em hapoh kani ka kamra, hawa pyrkhat chaphang i kylla ka thaaiñ deiwa ong wa nachwa ka mariang toh kawa yirngam kawa khooid nadooh ki um wa ka la’ær tangwa katni yi wa pynkylla yeini waroh? Ymtoh ki tre ri tre jylla tangwa da kiwa na baar kiwa wan hei pyrtuid ki karkhana.
“Ka sorkar jylla hei thaw u thooh ko ki laad ki luti wa kammon wow pynbha pynmiat ya ka mariang, wow kyrchaan ya kiwa rep wa riang, wow pynroi yei thung i tep wa boonjait, neibynta i myntoi yong ka pateiñ wa daw wan, tangwa sñiawsih wa pyn da ka sorkar hi wa wailaad ya kini ki kharkhana u wan ki wow pynjæd ya ka mariang wa yoohun ka yong i,” da ong u Wanshwa.
Ki kyntien yong oo kiwa da pynskem da ktah ki ya kiwa ap ya ki neibhah wa ka seiñ da slem bha wa yieñ ko wow pyrchah ya ki karkhana hapoh ka thaaiñ.
Da pynkut ya ka yalang da ki kyntien khublei na u Working President ka JNC Khliehriat Circle, u Diamon Bareh uwa da pynsñiaw yei sñiawngooh ya waroh kiwa chimbynta kiwa em yei sñiawkhia wow yada ya ka mariang.
Discussion about this post