Ha ka yalang yong ka Central Executive Committee (CEC) ka All Jaiñtia Muster Roll Workers & Labour Union kawa man ynne ka sngi ha MM Hall Mihmyntdu, ka seiñ da kyrpaad ko ya ka yung krehkaam u Chief Engineer ka PWD Road, Building wa ya ka PHE wow su noh ko yaka tulop wa sah 3 bnai yong kiwa kreh Muster Roll itæ nadooh u bnai March, April wa u May.
Uwa e buit ka seiñ, u Khroo Lamsalanki Pariat da ong u i sahteiñ yoh tulop kiwa kreh Muster Roll ha ka chnat PWD wa PHE ktah ko yei im yong ki neibhah i emkaam mih ki man-ka-sngi.
Suba haroh u wa yoosar ym em tikna i krehkaam kini ki Office neibynta kiwa kreh Muster Roll wot hawa neiliang ka chnat Finance ka sorkar jylla dadep e hukum ko cha waroh ki chnat krehkaam ka sorkar jylla wa toh u phah ki cha ka Finance ya waroh kiwa kreh Muster Roll khnang wa neiliang ka sorkar yow ye ko u booh bhah chwa 3 bnai ka poisa chwa u poi ki bnai wow su.
Ong u wot neiliang u Montri Rangbah, u Conrad Sangma leh dadep ong u ya ki wa ka poisa neibynta kiwa kreh Muster Roll toh kawa da em chwa.
Kamtæ da kyrpaad ki ya ki heh yong waroh ki chnat krehkaam sorkar wa em kiwa kreh Muster Roll wow su noh ya ka poisa ki.
Wei kyrpaad u leh ya u Montri Rangbah wow sñiawbha u wow pyrkhat kyrpang ha kam kani ka por wa da jan ka Behdieñkhlam ka Raij Jowai wa Raij Tuber wow su lut chwa wow kut uni u bnai June khnang wa kitu wa em ha ka Ñiamtre yow yoh pyndap pynbiang wei lehkmen ki ha ka yung ka sem.
Heiyatoh wa ka Arrear leh kyrpaad ki wow su noh.
Discussion about this post