Hei chem yei em uwi ya ka spah ka phaw, ki yung ki sem palat yeiwa ye u pynmih kam uwa kreh sorkar, neiliang ka Odisha Vigilance da lai kynreh ko ha ki khynde tylli ki thaw kiwa emyatoh wa u Baikuntha Nath Behera, Assistant Executive Engineer ka ITDA, Baliguda ka Kandhamal District ka jylla Odisha heiwa da chem leh ya ka poisa wa Rs. 2 klur kiwa da booh ha ki Bank Locker kiwa da suba toh kiwa yong ka yung ka sem u.
Ini i lai kynreh toh iwa da leh ha kylleiñ ka Bhubaneswar, Balasore, Jajpur wa Baliguda heiwa da chem kiwa boon ki yung ki sem wa syad dor wa kiwi de.
Yei lai kynreh da leh hadien wa suba joor ya u Behera heiwa da e bor leh da ka Special Vigilance Court ka Bhubaneswar, Odisha.
Ki pulit wa kynthup nadooh ki Additional Superintendent of Police, ki Deputy Superintendent of Police, ki Inspector da lai cha ki yung wa em ha Chandrasekharpur, Sailashree Vihar, Kanan Vihar, Dharmasala ka Jajpur District wa ha sor Baripada wa i yung wa sah u ha Baliguda wa ha ka Office u.
Kawi na ki yung toh iwa san mala iwa da suba toh wa mantre da uni u Engineer wa ka yung ka sem u. Da em leh kawi ka yung wa soo mala kawa da chna hei thaw wa heh 10,500 square feet ha Niladri Vihar, Bhubaneswar. Da chem leh wa em u sa soo tylli ki yung ha Bhubaneswar wa ha Jajpur District.
Da chem leh i ksiar, ka poisa ha Bank wei dang takit yow chem hadooh katwon chong dor waroh iwa em u.
U Baikuntha Nath Behera da yoh kreh sorkar u kam u Junior Engineer ha u snem 1999 heiwa ka tulop man ko du Rs. 6,000. Ha ki snem wa da lai da kreh u hapoh kiwa boon ki Tribal Development Agency wa kiwi ki kreh heiwa ha uni u snem da man u kam u Assistant Executive Engineer.
Neiliang ki bru ka Odisha Vigilance da kem noh ki ya uni u bru.
Discussion about this post