Ka Khliehriat Bar Association ha ka 2 tarik uni u bnai da yoh ko wow pynhaap pyrda yei lehkmen dap 10 snem yong ka hadien wa da seiñ ya ka ha u snem 2016 heiwa da pynman yei lehkmen ha Khliehriat West Community Hall.
Da wan wow sakhi yeini da u MLA ka Khliehriat Constituency, u Kyrmen Shylla deiwa emlang u Deputy Commissioner ka East Jaiñtia Hills, u Manish Kumar deilang u SP ka District, u P.K. Rasgania chirup wa ki waheh chnong ka Khliehriat West wa Khliehriat East kitæ u Justine Dkhar wa u Kedious Rymbai.
Ya ka yalang da pynlai da ka Khanaki Challam, heiwa da yoh yei klam na waroh kiwa chah khut sñiawbha.
Ha kani ka sngi da emlang leh wa kiwa seiñ ya ka Khliehriat Bar Association ha u snem 2016 kiwa da em 10 ngut kam ki Founding Member heiwa da pynkup burom ya ki wei da saam leh ki khusnaam cha ki muktiar kiwa jop ha ki yalehke waphær waphær kiwa da chimbynta chongchit nadooh wa sdang hadooh wa kut.
Ha kani ka sngi leh neiliang ka Khliehriat Bar Association da yoh ko u pynsñiaw wei wow e leh ya ka dorkhat ha u MLA ka Khliehriat Constituency hajrong i booddien wei wow tynrooh ya ka sorkar wa ka JHADC yow wanrah noh ya ka Judicial Branch ka JHADC ha Khliehriat yow pynkhlan ya ka Executive Branch yong ka Council iwa daw pynsuk ya ki paidbah ka thaaiñ East Jaiñtia u yajan ha ka rukom krehkaam.
Discussion about this post