U National Vice President ka NPP, u James P K Sangma ynne hadien wa thap pyrtuid kam u kyrtong MP Rajya Sabha da ong u wa daw rah u ya ki phang wa ktah ya ka jylla yow man u kam u chyoh ki paidbhah hapoh Parliament deiwa pynrap wa emkaam i krehlang yong waroh wa em ha ka sorkar.
Da e khublei u ya ki seiñ wa em ha ka sorkar synrop MDA-II wa da jied ya oo kam u kyrtong MP cha Rajya Sabha deiwa ong leh wa i kaamram yong ki toh wow chakri ya ki paidbah.
Da e khublei u ya u Chief Minister, u Conrad K Sangma, ya ki ar ngut ki Deputy Chief Minister wa ya waroh ki Minister, ki MLA kamjooh ya ka UDP, HSPDP, BJP chirup wa ki MLA samen wa kyrchaan ya oo kam u kyrtong MP cha Rajya Sabha.
Hanla ynne ka sngi man ko ka sngi wa khaddooh wow thap pyrtuid, da sñiawkmen u lada ym em wa yakhun pyrchah ya oo.
Chooh chooh u James da ong u wa ka samoi MP Rajya Sabha toh 6 snem wei ym kyruiñ de u chadien kat wympu kut ka samoi krehkaam yong oo.
Neiliang won u Conrad da ong u wa lada yoh u kyrtong ka NPP wow man kam u Rajya Sabha MP, daw rah u ya kiwa boon kiwa emkaam ki paidbah ka jylla wei daw chimbynta u leh hei yatai hapoh ka Rajya Sabha.
“I yooluti i wa u MP u man u kam ka yingkieñ hapyrdi ka sorkar jylla wa ka sorkar pyrdi heiyatoh wa kiwa boon ki kaam wa dang booddien ka jylla wei sñiawskem O wa daw ye u wow leh yeini,” da ong u Conrad.
Chooh chhooh da ong u wa lada chah jied u James kam u MP wa thymme, daw booddien u yei dawa pynkrehkaam ya ka Inner Line Permit wa kiwi de ki kaam wa dang sahteiñ yong ka jylla nadooh i tipmit ya ka ktien Khasi wa Garo, ki kaam wa yatoh wa ka Sixth Schedule, i pynkylla ya ka aiñ FCRA, i wan psiah pyrchah aiñ chapoh ka jylla wa i pynkrehkaam ya ka aiñ Meghalaya Resident Safety and Security Act.
Kam wow kdaw heini i thap Vote u man i ha ka 18 tarik uni u bnai nadooh 9:00 waje i step hadooh 4:00 waje i janmiet wei daw ñiaw Vote heipor 5:00 waje ka jooh ka janmiet.
Discussion about this post