Ka kot wa da thoh heiyatoh wa ka Kur Dkhar Raliang, da pynlait paidbah ka ha ka 13 tarik uni u bnai ha yung ka Bika Dkhar na ka chnong Raliang hei sakhilang kiwa na ka kur Dkhar, ki lok ki jor na Raliang, Nangkynrih, Iooksi, Saphai, Jri Kyndeng ha ka yalang wa pynlai da u Binroy Dkhar uwa man u Waheh Kur Dkhar Raliang.
Kani ka kot toh kawa e pyrtuid “Seiñjait Myngkti” wa da thoh da u Hamjhan H Dkhar.
U Hamjan Dkhar kam uwa thoh hawa klam pynsñiaw u i sñiawngooh ya ki ma ki woh, ki beimen beili wa da lai chakhmat u Blai wa kiwa dang im katni, kiwa khana pateiñ chaphang ka Kur Dkhar Raliang kamjooh ya waroh ka Kur Dkhar Jaiñtia Hills ha i thooh bniah yong oo.
Ong u wa ka Kur Dkhar Jaiñtia Hills roi parum pareh ko na ki 5 ngut chipayu, kitæ toh ka Myngkti Dkhar kawa chong wa sah ha Raliang, ka Tiangmon Dkhar kawa chong wa sah ha Nartiang ha u Lum Lyntiar Pator Ryngka, ka Pamswet Dkhar kawa chong wa sah nyngkong ha u Lumsyntoiñ Tuber, neitæ hadien da chong da sah ko ha Wapung, ka Saro Dkhar (kawa khut sin ki ka Dhon Tymmen, Khap-iaba) kawa chong wa sah ha Chyrmang, ka Sunamai Dkhar kawa chong wa sah ha Jowai wei kini waroh 5 ngut wan ki na Jaiñtiapur Sylot najan Barak Valley kawa haap katni cha Bangladesh. Wan ki jar jiar i por jar jiar ki thaw ki Raij kamwa man ka kur Dkhar katni.
Da yoh leh i klam na u Elad Dkhar, u Kñi ka Kur Dkhar Chymang, na u Besterwell Dkhar, General Secretary Seiñ Kur Dkhar East Jaiñtia Hills, na u Jesse Dkhar, President Seiñ Kur Dkhar West Jaiñtia Hills wa na u Dawan Dkhar u Kñi ka kur Dkhar Jowai.
U symbood kongsan ha kani ka yalang, u O.R. Challam kam u bru wa rap bna naam ka Jaiñtia Hills, da e khublei kyrpang u ya u Hamjhan H Dkhar hajrong i ye u wow thooh tre, u booddien yei tre i thied ka kur ka jait ka kur Dkhar.
Heijooh i por da e yumut u wow thooh u pynlang yonglang ya waroh ngut kitai ki chipayu yoh u man kawi don ka kot yong ka kur Dkhar Jaiñtia Hills, neibhah hawa da yoh kawi na kini da suk hi u wow pynbood u thoh.
Neiliang u kongsan won, u Harwis C Dkhar, President ka Seiñ Kur Dkhar Jaiñtia Hills Central Body, hawa klam da yaroh wei e khublei kyrpang u ya uwa thoh wa chimkhia u wow pynneh pynsah ya ka pateiñ ka Kur Dkhar Raliang, yooluti u wow skem u nang ye chooh u wow thoh chiboon tylli ki kot kamwa kani wym toh ka sien nyngkong wa da yoh u wow sakhi yaka yalang wa pynlait ya ka kot wa thoh u Hamjhan Dkhar.
Ong haroh u kamwa napoh ka kur Dkhar uni da man u uwa thoh kot wa da pynmih boon tylli ki kot, kamtæ da kyrpaad u ya waroh ki Kur Dkhar ha man ki chnong wow pyrchang ki u thoh kamni khnang yow neh sah ka pateiñ yong ka kur heiwa ki khynroo khyllood leh u tip ki ya ka kur ka jait yong ki na kawi ka pateiñ cha kawi.
Ha kani ka yalang yei kyntien ngooh Blai da yoh na u Stephan Dkhar uwa man u Pator ka Raij Raliang katwa yei kyntien e khublei da yoh na u Medistar Dkhar.
Discussion about this post