Mynjur ka sorkar u pynkhreh ya ka Small Scale Mining Policy hadien wa yachem wa ka JCOMSWA

Ka sorkar jylla da rai ko wow thung da ka Committee yow wanrah ya ka Small Scale Mining Policy yow e laad u khih mooyong da kiwa kiwa khian wei yeini da mynjur ynne ha ka yalang ka Jaiñtia Coal Owners Miners Suppliers and Worker Association (JCOMSWA) wa u Chief Secretary ka jylla, u Dr. Shakil Ahmed.

Hawa yaklam wa kiwa thoh khubor, u Information Secretary ka JCOMSWA, u Overcome Dkhar da khana u wa ha kani ka Committee u emlang ki dkhot ka Association ryngkat ka yung krehkaam u Deputy Commissioner ka East Jaiñtia Hills yow pynkhreh u chna namo wow Draft ya ka Small Scale Mining Policy.

Kiwi de ki rai toh wa ka sorkar u khang chwa ko chipor ya u mooyong wa wanrah na baar hadooh wa wan u Justice BP Katakey ha ka 29 tarik uni u bnai. Sa kawi ka dawa yong ka Association toh wow pynkrehkaam ya ka Scheme yarap ya kiwa tih mooyong kiwa da chah ktah nadooh wa khang ya u mooyong wei wow phah leh ya ka JHADC yow chna aiñ hajrong ki marpohkhyndaw.

Related posts

Kyrpaad ki ar seiñ wym toh u pynman yakhih ha ka sngi yaaw ka Khliehriat

June 17, 2026

Pynbna ka JHADC ya ki kur ki Biate wa ki Hadem kiwa da tipmit kam ki Schedule Tribe

June 17, 2026

Hawa kylli, da ong u wa i yaklam daw pteiñ biang i hadien wa wan u Justice (Retd) BP Katakey, deiwa pynrap wa ka yakhih ka Association leh daw pteiñ hadooh wa wan uni u dkhot wa da thung da ka Meghalaya High Court.

Da ong u leh wa i chah thngan daw pteiñ ko hadooh wa wai ya u mooyong neibhah i dawa toh yow wai noh ya u mooyong yow kreh da kiwa khian wa nai ki wym kotbor wow yoh thaw kreh iwa heh hadooh 100 Hectare.