Ka seiñ United Hynñiewtrep Movement chirup wa ka Jaiñtia Revolution Council ynne ka sngi da maham ki wow lai chakhmat katkam ka aiñ lada ki bor sorkar ym chimkhia ki hajrong i em ki Truck kit mooyong pyrchah aiñ kiwa lai dei miet kiwa wan na ka thaiñ East Jaiñtia wei lai lyngba ka chnong Mynska, Shangpung, Raliang wa kiwi ki chnong ka West Jaiñtia Hills, wot hawa neiliang ka seiñ UHM dadep ko wow ujor cha ki bor District ka West Jaiñtia Hills nadooh ka 11 tarik uni u bnai.
Ka seiñ ha ka ujor da ong ko wa kini ki Truck kit mooyong pyrchah aiñ da pteiñ yoh ki wow lai katwa ngait wot lyngba ka Raliang Police Station, ki Police Outpost yong ka Saphai wa Barato.
Heiwa da ong haroh ki wa i yoh lai katwa ngait ki Truck kit mooyong pyrchah aiñ khlem em wa ksoh wa pait da pynartatien yei rukom krehkaam ki bor ka aiñ khamtam wot hawa lai ki lyngba kitai ki Police Station wa Police Outpost.
Ka seiñ ha ka ujor da kyntu haroh ko ya ki bor District wow hiar lai pait da ki hi ya ki Truck hei miet ha kitai ki thaw wei wow takit leh hajrong i wym chim kitkhlieh ki pulit wow leh yei kaam.
U President ka United Hynñiewtrep Movement, u Pynjurbha Suchiang hawa klam cha kiwa thoh khubor ynne ka sngi, da pynsñiaw u i phylla wa hanla boon ki Check Point leh kini ki kari won yoh bait ki u lai katwa ngait chadooh ki thaw wa mut wa thmu ki.
Ong u kamwa man kattæ haka thaaiñ Mukroh wa Barato da em i Stock mooyoong chawa palat wei kani ye ko leh u ktah ya ki thaw rep yong ki paidbah ka thaaiñ.
Chooh chooh ong u wa ka seiñ ym em pyrchah ko yei lait mooyong, tangwa toh u e laad næ wai deiwa yoh bynta warohlang yow yoh kamailang leh kiwa dooh wa khian wa nai ymtoh u em kiwa yoh u khih wa kiwa dooh u khih.
Kamtæ kyntu u ya ka sorkar wow khang syndon noh yei kit mooyong pyrchah aiñ lym kamte ka seiñ u lai ko chakhmat katkam ka aiñ.
Kyntu haroh u wa la kammon kammon toh u hiar lai takit sakhi da ki bor District hi yei kit mooyong pyrchah aiñ wa ya ki thaw wa pynhaap mooyong neitæ u kem wei pynchitom leh ya kiwa emkti.
Discussion about this post