Ki soo ngut kiwa chi yung da dooh ki yei mynsien nei chah tyrrah ka kari ki ha u sarok Delhi-Dehradun Expressway hadien wa uwa yah ya ka kari ki da lai u dei dien hadien wa mylliñ wow chim ya ka luti wa toh u lai ki wei da wan kawi ka kari Scorpio kawa da tyrrah ki nadien.
Katkam wa riñ ka CCTV, ini da jia i hajan ka laad wow lai cha Halgoya, Sharanpur District ka Uttar Pradesh wei kani ka kari wa chah tyrrah toh kawa wan na Bahadurgarh, Haryana yow lai cha Haridwar neibynta wow lai sum ha ka wah Ganga heipor wa jia ini.
Kani ka kari toh kawa da mut wow chim ya ka laad wow lai cha Halgoya tangwa da lai bait ko, kamtæ uwa yah da lai u dei dien yow poi cha kani ka laad kawa em pyn hajan tangwa neidaw wa ki kari wa lai ha uni u sarok toh kiwa pynhær da chem chitom uwa yah Scorpio wow sangeh heipor.
I ya tyrrah toh iwa joor bha heiwa ka kari wa chah tyrrah da sied ko rap jngai wei ka Scorpio da kylla ko.
Ki chi yung kiwa yap toh kiwa tip kam u Praveen (40), ka kurim u ka Preeti (37), ka bei u ka Sudesh wa u khon uwa dang 9 snem uwa tip kam u Shivansh.
Ki le ngut won kiwi kiwa emlang hapoh kari da mynsoo joor ki wei da pynkit ki cha ka thaw sumaar.
Discussion about this post