Ka Hima Sutnga Youth Federation (HSYF), Elaka Sutnga ynne ka sngi da lai yachem ko wa u Food Safety Officer ka East Jaiñtia Hills District yow kyrpaad ya ka Food Safety Department wow pynman yei lai sylli (Inspection) kawa man-i-por ya ki dukan kiwa em hapoh u pood u ang ka Elaka Sutnga, khamtam ha yaaw Sookilo wa ha yaaw Umpleng.
Ka HSYF da kwah ko wow pynche wa ini i dawa man ko du kam ka laad yada wei ymtoh wow pyrchah næ ujor ya kawon kawon ka dukan næ kiwa khayi. I thmu hi toh wow yada yei chait i khiah yong ki paidbah wei wow pynchlur ya kiwa khayi wow bood ryntih ki yei kyndon yong ka Food Safety.
Chooh chooh ka HSYF da ngait ko deiwa lai pynman Inspection dei langær daw pyntikna ko wym em kiwon kiwon ki marbaam kiwa da kut por namo kiwa da Expired, ki wym em miat wym em bha (Sub Standard), næ ki wym em chngaaiñ wow pynemkaam kiwa poi cha kiwa thied.
Najrong ini waroh deiwa lai pynman da ka Inspection daw pynsñiawthooh ko ya ki tre dukan wa kiwa khayi chaphang i kitklieh yong ki katkam ka aiñ.
Neiliang u Food Safety Officer da e u yei kyrchaan ya ini wa da dawa ka HSYF wei da pyntikna u leh wa ka chnat daw lai pynman ko ya ka Inspection ha kini ki sngi wow wan.
Ka HSYF da kyrpaad ko leh ya waroh ki tre dukan wa kiwa khayi hapoh ka Elaka Sutnga wow dai ki du ki mar baam wa chngaaiñ, kiwa bha wa kiwa biang katkam ki kyndon yong ka aiñ wei kam ka seiñ daw leh ko yei bynta yong ka wow pyntikna wa waroh ki mar baam kiwa dai cha ki paidbah u man ki kiwa chngaaiñ wow baam. Lada chem ya kiwon kiwon ki dukan wa leh pyrchah daw pynchitom wei daw e cha ki bor yong ka aiñ.
I pyntip na u Secretary ka HSYF, u Samanbha Supoh.
Discussion about this post