Ka Bosco Pnar Jowai kawa man ka chlem e sikai neibynta ki jait sap waphær waphær ha ka 30 tarik da pynman ko ya ka Job Fair namo ka rynsan wa kyrpang neibynta u yoh khih yoh kreh ki khon khynroo khyllood kiwa da pyndep yei chah sikai wa boon jait.
Ha kani ka Job Fair da wan wow chimbynta da ki khynroo khyllood wa thooh khih thooh kreh deiwa emlang ki Company næ ki chnat krehkaam na Guwahati, Shillong wa Jowai kiwa em kamwa 11 tylli.
Neiliang kiwa chimbynta ha kani ka Job Fair wa kynthup nadooh kiwa da pyndep yei chah sikai hei yatoh wa ki Computer, Tailoring, Designer, Beautician wa kiwi da pynsñiaw ki yei kmen wow yoh kam kani ka laad ka rynsan thooh khih thooh kreh wa da wanrah ka Bosco Pnar.
Em leh kiwa pynsñiaw yei sñiaw skem lyngba i sikai wa yoh ki na kani ka chlem, neibhah wa da tipsap ki kattu kammon u lai luti hei im neibynta u sdang khih sdang khan.
Ya kani ka Job Fair ha kani ka sngi da wan wow wai ya ka da ka Bibilaris L. Mawnai, District Employment Officer, wei hawa e i klam ong ko wa ka Job Fair toh ka rynsan hapyrdi ki Company wa ki bru wa thooh khih wei man ko leh ka yaaw neibynta u e khih e kreh ya kiwa thooh khih thooh khan najrong wow yoh leh ki buit.
Da pynkynmoo ko leh ya le tylli ki mat wa kongsan cha waroh kiwa thooh khih, itæ wow man kiwa pynkhreh wei thooh bniah ya ki Company wa lai mih, u tip leh yei dor wa i rukom krehkaam yong ki, wei wow sñiawthooh ya ka thong.
Iwa ar u em i chaniah ha idæ, deiwa pynrap leh wa najrong wa emkaam ka kyrdan tangwa iwa rap hakhlieh toh i rukom man iwa em yei mon wow kwah u tip yeiwa thymme wei ini ye u pynkhroo ya idæ wei khynjoh cha ka thong wa chaphrang.
Iwa le won wow man kiwa ye u pynyatoh wa i kylla, neibhah wa ha iwon iwon i khih wa kreh, ym ye u man ka wow neh bait kamjooh, na itæ i daw hap man kiwa pynkhreh ya iwon iwon i kylla ka por.
Kiwi won wa e i klam kynthup ki ya u Director Manager kani ka Job Fair, u Stephen Kharbani uwa da khana leh yei lai luti ka Bosco Pnar wa i chakri wa e cha ki paidbah.
Chwa u sdang da yoh yei ktien pdiang na ka Phibarishisha Nongbsap.
Discussion about this post