Ka seiñ East Jaiñtia Hills Drivers Association, ynne ka sngi da lai yachem ko wa kiwa mihkhmat ka Dalmia Cement Factory kawa em ha chnong Wahiajer, East Jaiñtia Hills neidaw wa da joor chem chitom kiwa yah kari.
Ka Association da ong ko wym yoh kiwa yah kari deilang kiwa yarap ya ki wow psiah chapoh ka thaw Loading Cement, Clinker wa kiwi kiwi de. Neiliang u Lambormi Dkhar kam u President ka Association da yoh u yaklam wa katai ka Company yow kylli neiyi i daw wym chah u psiah ki Handyman wa ki Spare Driver chapoh ki thaw Loading.
Chooh chooh da ong u wa boon ki Driver wa ujor cha ka seiñ neidaw wa chem chitom ki khamtam heipor miet por synyaaw wa i por por slap neidaw wym chah u chong næ thiah ki Handyman hapoh kari heiwa da chah pynhiar ki ha kiwa yang Gate næ ki Security.
Heijooh i por leh ka thaw pynyang ki toh ka wym em biang tang ka thaw chong thaw dem wei da hap ki wow yang hadooh soo san kynta cha madan.
Neiliang ka Association da dawa joor ko na ka Company wow pynbiang chwa ya ki thaw chong næ thaw thiah ya ki Handyman lada khang ya ki u psiah cha ki thaw Loading.
Lym chah ka Company u psiah ki Handyman cha thaw Loading, neiliang ka Association wym chong kli kti ko wei daw booddien yeini i kaam.
Discussion about this post