Pyndep ka Raij Jowai ya ka Behdieñkhlam 2026 dei mynsien yatylli wei maya

Ka lehniam Behdieñkhlam kawa tip leh kam ka Soo Sngi Le Yaaw yong ka Raij Jowai ynne ka sngi Muchai ka 9 tarik u Naiynñiaw da poi ko cha wakut ha Aitnar heiwa da man ko kawa wanrah yei mynsien yatylli wei maya markylliang.

Ynne dang step ki khon ka Loompyrdi Iongpiah da pyndep ki ya ka Kyntiñ Khnong ha Yung Langdoh wei manda dep neini da pyndep ya ka choh thyndai ha waroh ki yung ha Khonraij wa ha Kmairaij.

Hadien ini heipor nohchariñ sngi, ki Kmairaij da pynkhreh ki wow pynhiar ya ki Rot ki Rong ha Syiem Aitnar heiwa da wan sakhi da ki phaw hajar ngut na kylleiñ ka jylla, ka ri wa na baar ri.

Ha Aitnar da wan sakhi da u Chief Minister ka Assam, u Himanta Biswa Sarma kam u kongsan hei emlang u Dy. CM ka jylla, u Sniawbhalang Dhar chirup ki Montri ka sorkar jylla nadooh u Wailadmiki Shylla, u Lahkmen Rymbui wa kiwi.

Ki Khonraij hadien wa dep i choh thyndai wei i pynhiar ya ki dieñkhlam ka Bon wa ka Doh ha Aitnar, neitæ da pynhiar ya ki le tylli ki Rot ki Rong wei da wanrah won ya ka Symbood Khnong heiwa ki khon ka Raij da yaknieh ki wow tba ya ka wow yoh yei kyrkhu kyrdoh.

U Himanta hawa e i klam da ong u wa kani toh ka sien wa nyngkong wa sakhi u ya kam kani ka lehniam wei da e khublei u leh ya ka Seiñraij Jowai wa da khut sñiawbha ya oo.

Ha uni u snem ki Rot ki Rong da e Wyrta Chula ki ya ki kyntien wa har rukom nadooh i e burom ya ka mariang, i ktah ka stat ka juk wa katni, i emkaam yei chait i khiah wa kiwi.

Hadien wa da pynhiar lut ya ki Rot ki Rong, ki Khonraij da e ki sa ya ka Khnong Blai heiwa ki dap chynrang waroh yaknieh ki wow tba ya ka wow e ngooh wow paan yei kyrkhu na ki Blai ki Syiem.

Hadien wa kut na Aitnar da pyndep ya ka Datlawakor heiwa ka dhab u Langdoh wa mihkhmat ya ka Pynthor Wah da man ko kawa jop wei katkam i ngait ha uni u snem u kba u hoi u ha Pynthor Wah.