Ka Hill State People’s Democratic Party (HSPDP) da pynsñiaw ko yei kyrchaan ya ka sorkar Meghalaya yeiwa da pyrchang ko wow pynbait ya u pood wa ka Assam iwa man i kaam wa da sahteiñ da ki phaw snem, wei da pdiang sñiawbha ki yeiwa da lai biang chakhmat yow pynkhreh u leh yeini kam chibynta ka Second Phase ka yaklam.
U President ka HSPDP, u K.P. Pangniang da ong u wa ka Party toh kawa emlang hapoh ka sorkar Meghalaya Democratic Alliance (MDA) wei man ko kawa kyrchaan yeiwa thooh laad ka sorkar wow pynbait deiwa sah deiwa neh rta, wei sñiawskem u leh wa ki 6 tylli ki thaw wa dang sah wa hap pynbait daw ye wow poi chei pynbait noh hei yahkhmat u Conrad Sangma kam u Chief Minister.
U Pangniang da ong u wa i yaklam daw pteiñ i deiwa burom ya ki kyndon wa da booh, ki parom wa em nadooh i yongrim, i suk ya kiwa chong chnong wei katkam wa kwah kiwa chong chnong kiwa chah ktah yow yoh ki yei synchaar khadar wa biang.
Heiyatoh wa ka bynta khappood ka West Khasi Hills, u Pangniang da kyrmen skem u wa ka Regional Committee wa khlieh da u Metbah Lyngdoh ym slem de daw yaklam ki wa ki bor District ka Kamrup yow pynlai smat yei kaam.
Da ong u wa ka Langpih dang pteiñ hi ko wow man kawa eh wei kawa kyllaiñ bha tangwa da kyrmen u wa hei yaklam wa daw pynman deiwa bood ya ki kyndon deilang i chimbynta kiwa chong chnong daw ye wow pynbait yeini deiwa hunlang waroh arliang.
Discussion about this post