Uwa chong chnong ka Kynshi wa em ha Eastern West Khasi Hills uwa tip kam u Kitkupar Nongsiej daw mihkhmat u ya ka jylla kamjooh ka ri deiwa lai chimbynta ha ka World Championships of Performing Arts (WCOPA) 2026 kawa daw pynman ha Las Vegas, USA, nadooh ka 13 hadooh 21 tarik uni u bnai.
U Kitkupar Nongsiej toh uwa jop ya ‘Ka Sur Kynud Season 3’ kawa pynman da ka Don Bosco Media Network (DBMN). Wei kam chibynta wow pyn-eh-daw pyn-eh-nasib ya oo, neiliang ka Don Bosco Youth Centre (DBYC), Laitumkhrah deilang wa ka Don Bosco Media Network & TV, da pynman ki ya ka yalang duwai Blai deiwa emlang ki heh Balang, kiwa emyatoh wa ki lok ki jor u yow e yei kyrkhu yow yoh u yei jop heini i lai luti u.
U Kitkupar daw mih u na Shillong myntu ka sngi deiwa emlang u pa u, u Aibari Kupar Syiemlieh yow lai cha Las Vegas. Da toh u lai u ynnin u snem cha USA yow chimbynta tangwa da pyndam noh ya kani ka yakob na ki daw wym ye u kiar.
Ha ini i por u Kitkupar da pynpliah chooh chooh u yei sap rwai u wei da lai chibynta u leh ha Ka Sur Kynud 3 deiwa jop u ka leh heiwa da yoh u ya ka song-poisa wa Rs.1 lak.
U Kitkupar da chimbynta u leh ha ka Sur Kynud Niam Season 2 wei ya kani leh jop u ka wei da yoh u ₹35,000.
I sap yong oo da pynyoh thaw leh ya oo hapoh ka Shillong Chamber Choir, heiwa da yoh laad u wow pynpliah chooh chooh yei sap yong oo. Ha u 2025 da chimbynta u leh ha ka International Exposure Programme ha Indonesia kawa da kyrchaan poisa da ka Sports and Youth Affairs ka sorkar Meghalaya.
U Kitkupar toh uwa rwai leh ya ki sur tynre yong Khasi kiwa da mih leh hapoh ka Doordarshan Meghalaya.
I chah jied won u wow chimbynta ha ka World Championships of Performing Arts (WCOPA) 2026 toh hadien wa leh ya ki Online Audition yow man u kam uwi na ki dkhot ka Team India. Wei ya kani ka yakob da tip ka leh kam ka “Olympics of Performing Arts,” heiwa da chimbynta kiwa rwai, kiwa chaad, kiwa tem wa put wa kiwi de ki sap wa em ki bru kiwa wan na palat 60 tylli ki ri hapoh pyrthai.
Ka Don Bosco Media da pyntip ko wa kawa nyngkong dooh wa jop ya Ka Sur Kynud, ka Chevinia Lyngdoh Mawnai da kyrchaan poisa ya ka heiwa da mihkhmat ko ya ka India ha ka UK Vocal Star Competition ha United Kingdom heiwa da jop syndon ko ya kani ka yakob.
Discussion about this post