U Union Petroleum & Natural Gas Minister, u Hardeep Singh Puri da ong u wa ka sorkar pyrdi da pynkhreh ko wow wanrah yei phñiang kari wa tip kam i E85, wei ini daw duna dor i da kamwa Rs. 20 chi litre hawa nujor wa i E20 Petrol.
Da pynche u wa ini i phñiang E85 daw ye wow pynemkaam du ha ki kari donhi kiwa da chna neibynta ini i jait phñiang kiwa tip kam ki Flex-Fuel Vehicles (FFVs) wei ini daw yarap ko ya ki paidbah kam chibynta i pyrchang ka sorkar wow pynstiñ yei lut i sep deiwa lai chakhmat wow khleh yei Ethanol wa i Petrol.
Da yada u leh ya ka Biofuel Policy ka sorkar deiwa kyntait yei em kiwa ong wa ini i jait phñiang ktah ko ya ka kari wa pynemkaam yei Petrol wa khleh wa i Ethanol.
Ha u bnai wa dep, u Hardeep da wai paidbah u leh ya ka thaw e phñiang E85 ka IndianOil wa em ha New Delhi.
I E85 toh iwa tip leh kam i High-Ethanol Blended Fuel heiwa 80–85% toh i Ethanol wa 14–19% i Petrol, wei ki kari wa ye u pynemkaam ya kini toh kiwa tip kam ki Flex-Fuel Vehicles (FFVs), kiwa hoi u thap nadooh ka E20 hadooh E100, iwa mut wa ki tre kari ye ki wow jied da iwon iwon i Petrol wa da khleh wa i Ethanol.
Kam wow sdang daw e yeini i phñiang ha ki 48 tylli ki Petrol Pump wei daw pynku cha 500 tylli kat ha u December 2026 wa 5000 tylli kat ha u December 2027.
U Hardeep da ong u wa deiwa khleh wa i Ethanol daw yarap ko wow pynduna i lut hadooh ₹1.84 lak klur deiwa wanrah phñiang na baar ri iwa mut da duna 302 lak metric tonne i Crude Oil.
Chooh chooh da ong u wa i phñiang E85 pynduna ko yei mih tdem da 61% hawa nujor wa ki kari wa pynemkaam da i Petrol wa khlem khleh wa i Ethanol wei neh slem leh ka Engine kari.
Da ong u wa lada 50% ki thuk-thuk wa ki soo chaka toh ki Flex-Fuel Vehicle, daw yarap ko ya kiwa rep heiwa daw yoh khih hadooh ₹12,403 klur deiwa thung da ki mar rep wa pynmih yei Ethanol.
Discussion about this post