Ka Khasi Students’ Union (KSU) Shillong Mihngi Circle ynne da lai yachem ko ya u DIG ka CBI hajrong iwa da kam ko toh iwa chna pyrchah aiñ ya ka Mandir hapoh ka pchem kani ka yung krehkaam ka sorkar.
Hawa yaklam wa uni u heh ka CBI da mih i yania wei yatai wa joor hapyrdi ki dkhot ka seiñ wa kiwa pynlai ya kani ka yung krehkaam heiwa ka yaklam ym em poi ko cheiwon cheiwon wei neiliang ki dkhot ka KSU da pynsñiaw ki yei chrai heiwa da khang tala syndon ya kani ka Mandir.
U Asst. Organising Secretary ka KSU CEC, u Jeremiah Pohtmi da ong u wa ha kini ki snem wa dep neiliang ka KSU Shillong Mihngi Circle da lai yachem ko wa u heh ka CBI yow pynsñiaw yei chna pyrchah aiñ ya ka Mandir hapoh i thaw kani ka yung krehkaam ka sorkar wei ha itu i por da kular wym pteiñ de yei pynchna.
Tangwa du ha kini ki kajiak sngi da tip ka seiñ wa i kreh yow chna ya kani ka Mandir da lai i chaaid chaaid wei da yoh leh wow sakhi yeiwa pynchna ya kani ka Mandir toh iwa da jan dep.
Kamtæ ynne ka sngi hadien wa khang tala ya kani ka Mandir, da e por chi tayaaw wow pynpra næ pyndam noh ya kani ka Mandir wei lada ym leh yeini, ka seiñ da maham ko wow chim da kiwi won ki luti wa rap khor hajrong ini i kaam.
Ka seiñ da ong ko wot ka Supreme Court leh da klam ko boonsien wa ya ki thaw sorkar ym ye wow pynemkaam ki yow chna ya ki yung niam wei toh u pynemkaam wow leh yei kaam katkam wa da booh bhah.
Discussion about this post