Ha ka yalang yalap Election MP chiteiñ samoi neibynta u kyrtong ka NPP, u Dr. DRL Nonglait kawa da pynman hei miet ka 21 tarik uni u bnai ha madan Khawang ka chnong Ummulong kawa haap hapoh ka Nartiang Constituency, da sakhi yei wan chimbynta ki paidbah wa boon wow ap u sñiaw yei klam kiwa yahkhmat ka Party khamtam i klam na u kyrtong u Dr. DRL Nonglait.
Ha kani ka yalang da emlang u Deputy CM, u Sniawbhalang Dhar uwa man leh u MLA ka thaaiñ neitæ u Wailadmiki Shylla, Montri sorkar uwa man leh u MLA ka Jowai Constituency, u Dr. C. Lyngdoh MLA ka Umsning, ki MDC ka JHADC najrong ki heh wa yahkhmat ka Party.
Kamwa kani ka Bye Election em ko hadooh 36 tylli ki Constituency, u Dr. Nonglait hawa klam ong u, “Kam uwa sikai jooh chim O wa hawa yaleh ya kawon kawon ka Exam næ hawa yaleh Exam ki khynnah jooh kheiñ yei em ki Paper, neibhah kawon kawon ka Exam pyntikna ko yei em ki Paper, wei kani ka MP Election wa yakhun O em ko hadooh 36 tylli ki Paper yeiwa nga sñiaw O toh kawa eh tam ha i puræ wa i yakhun, tangwa hanla kattæ leh yooluti O wow yoh Distinction ha waroh ki Constituency khamtam ha Nartiang wa Jowai Constituency”.
Ong u leh wa kini ki sngi toh kiwa eh neibhah wa nang ku ha ki liang waphær, i eh leh nang wan ki ha ka imlang sahlang wei kamwa ka synchaar khadar em ko i kaamram wa khroo u kyrriah yei eh, na itæ i daw sñiaw u wow mih yow embynta haka shynchaar khadar yow yarap ya ki paidbah deiwa pynrap leh wa i eh hei bor pyrkhat pyrdaiñ joor bha ko ha kini ki sngi.
Kyntu haroh u ya ki paidbah wow e kyrchan ya oo ha kani ka Election chiteiñ samoi neibhah kani ka Election toh kawa da tip chwa yi wa chna sorkar ha ka sorkar jylla wa ha ka sorkar pyrdi, kamtæ emkaam leh u jied da u kyrtong wa em heiliang ka sorkar khnang yow suk yaklam neibynta kawon kawon ka kaam.
Heijooh i por ong u kam u President ka Khasi Author Society lada jied ki paidbah ya oo kam u MP daw yachem yaklam u wa ki Montri sorkar pyrdi neibynta u pynpsiah noh yaka ktien Khasi hapoh ka 8th Schedule ka riti synchaar ka ri, kamwa kani ymtoh du kat ka dawa yong ka Khasi Author Society næ ka NPP wa yahkhmat ya ka sorkar Meghalaya tangwa yong ki paidbah, ki seiñbhalang waroh kamjooh ki Party wa em hei liang pyrchah ka sorkar jylla leh e ki i kyrchaan yeini. Kiwi de toh yow yakhun pynyoh ILP leh ha ka jylla.
Chooh chooh ong u wa daw lai u cha Parliament yow yasaaid neibynta i myntoilang yong waroh ki seiñ saiñhima hapoh ka jylla.
Discussion about this post