U Symbood Montri Rangbah ka sorkar jylla uwa man leh u MLA ka Nartiang Constituency, u Sniawbhalang Dhar ha ka yalang yalap Election MP chiteiñ samoi neibynta u kyrtong ka NPP ha madan Kawang Ummulong hei miet ka 21 tarik uni bnai, da pynsñiaw u ya ki kaam wa da leh ka sorkar MDA heiyatoh wa i roi i paar hapoh ki 8 snem, wei ong u leh kini kiyi kiyi waroh jia ki toh wa ka sorkar MDA hapoh i yahkhmat ka NPP ymjooh pynlut por ki hei wow yaknieh bor u yachrut para ki tangwa man ki kiwa yatylli wei kreh yei kaam kammon u myntoi ki paidbah ka jylla.
Khana u wa hapoh i yahkhmat ka NPP ha u 2018, ka Budget yong ka sorkar jylla man ko Rs. 9000 klur, katkam wa man katte won du hapoh 8 snem ka Budget da tam ko ya Rs. 30,000 klur. Ini jia i toh wa yoh da kiwa yahkhmat wa kreh chitom lym kamtæ ka Budget ym ku ko.
Da sngoh haroh u ya ki Political Party wa pynbaad chim ram wei pynbaad baam tooh ya ka sorkar MDA deiwa ong u wa ya ka ram da chim hapoh u pood wa e laad ka Union Finance Ministry wei deiwa lai leh katkam ki kyndon ka aiñ, ym mut du kat wa chong hei bor u yoh leh katwa ngait. Wei hawa pynbaad baam tooh ya ka sorkar MDA toh u pynyoo leh ki sabut.
Chooh chooh ong u heiyatoh wa ki sarok ha kini ki 8 snem tam wa da lai, la 3400 Km dang du ki sarok warim wa chna pynbha ka sorkar wa da kynjoh Rs. 4600 klur, neitæ 1600 Km tam da chna ki sarok thymme wa da kynjoh Rs. 5000 klur.
Khana haroh u wa heipor wa wan u Union Transport Minister ka ri India ha Shillong, u Nitin Gadkari, da kular u wow e sa Rs. 39,000 klur neibynta ki Project chna sarok ha Meghalaya, neitæ u Defence Minister ka ri India leh da kular u wow pynyoh poisa neibynta ka Border International Ring Road.
Chooh chooh pyntip u wa ym slem de daw wan u Prime Minister ka ri yow booh mooyurim ya ka Project waheh tam ha North East, itæ u sarok Four Lane New Corridor uwa 166 Km nadooh Umroi chadooh Ratacherra yow poi cha Assam hei lut wa kamwa Rs. 21,800 klur.
Neitæ ka chnat Tourism heipor wa chim kti ka sorkar ha u 2018 ka Budget ym jooh palat ko Rs. 50 klur, tangwa nadooh wa chimkti ka MDA hei yahkhmat ka NPP iwa duna dooh toh Rs. 2000 klur chi snem, wei neibynta i chait i khiah ka sorkar da booh bhah ko leh 9% na ka Budget yow lai cha ka chnat i chait i khiah.
“Hajrong kini kiyi kiyi pynyoo wa ka sorkar toh kawa kreh chitom wei kawa yoh i chaniah tæ poi i roi i paar, wei lada ki paidbah won sñiawthooh bakla ki yei klam kulmar kiwi, ka jylla ymtip de kammon u man ko,” da ong u Sniawbhalang Dhar.
Discussion about this post