Hei sien nyngkong i parom ka jylla, da chim yukheiñ wow bichaar yow pait yei bha i miat ki 11,443 tylli ki skur wa em ha Meghalaya wei yeini waroh wa da chem da pynmih hapoh ka Meghalaya School Performance Grading Index (MSPGI) 2025-26 kawa da pynlait ynne ka sngi da u Montri ka chnat Puræ Puthi, u Lahkmen Rymbui.
Kini ki 11,443 tylli ki skur toh kiwa em ha ki 12 tylli ki District ka jylla heiwa da bichaar ki deiwa pait ya 43 tylli kiwa emkaam ki u em hapoh ka skur deilang ki 5 tylli ki Assessment Domains (Accessibility, Digital Education, Infrastructure Facilities, NEP Activities & Quality Parameters) wei da booh ki ha ki 17 tylli ki kyrdan (Performance Grade) heiwa waroh ki Points wa ye u yoh man ko 1,000.
U Lahkmen da ong u wa kani ka MSPGI ymtoh wow pynyoo kawon kawa miat dooh tangwa u man ko kam ka laad yow chem heiwon wa tlot wei yow pynkhlan deiwa leh da iwa yahaap yow ye u pynku ya ki skur.
Yeini da leh deiwa yoh yukheiñ na ka UDISE+ 2025-26 kiwa pyndap wei pyntikna da ki skur hi.
Na kini ki Performance Grade, kawa hakhlieh dooh toh kawa tip kam ka Utkarsh (Outstanding) wei kawa ha tre dooh toh ka Akanshi-10 (Intensive Support) wei kini kiwa em cha tre dooh toh kiwa emkaam yarap dooh.
Kani ka MSPGI da pynwandur ka yow sariem ko ya ka Performance Grading Index (PGI) wa pynman da ka Ministry of Education ka sorkar India kawa da bichaar yei lehbha i puræ puthi ki jylla wa em hapoh ka ri.
Ki skur ye ki wow pynemkaam ya kani ka Report wow ya pyrkhat para ki yow pyndap yeiwa duna deiwa paan yarap na ki Block wa ki bor District kamjooh wow pait leh ya kiwi ki skur hapoh ka Block kiwa ye u lehbha deiwa pyrchang wow bood ya ki.
Neiliang ka chnat Education da ong ko wa deiwa em kani ka MSPGI ym em mut wa daw dam noh u leh ya ki Inspection wei ini ym em kheiñ leh hadooh katwon lehbha ki khynnah ha kini ki skur.
Ki skur da chah bichaar ki deiwa pait lada em ki nadooh ki Class khian hadooh ki Class heh wei kiwa em yeini da yoh ki 30 Point, lada em ya u sarok wa miat yow lai cha ka skur da yoh 12 Point, kiwa em Anganwadi Centre hapoh i pchem ka skur da yoh ki 15 Point, lada em Smart Classroom da yoh 15 Point, lada em Library da yoh ki 30 Point wa kiwi kiwi de ki kyndon.
Hadien wa dep khieñ lut waroh, ka Jyoti Sroat HS School wa em ha East Khasi Hills da yoh nyngkong ko deiwa yoh 930 Point na 1000 Point wow man ka skur wa biang dooh waroh iwa emkaam ha Meghalaya. Ha tre dooh da em ka Step by Step Lawwahksei LP School, West Khasi Hills District kawa yoh du 26 Point na ki 1000 Point.
Ha ka Top 20 da em kawi ka skur na East Jaiñtia Hills katæ ka Star Public School kawa da yoh ya ka 9th Rank deiwa yoh 869 Point.
Ha East Jaiñtia Hills da em 513 tylli ki skur wa da kheiñ hapoh ka MSPGI 2025-26 wei ki Top 20 wa ki Bottom 20 man ki kamni:
Ha West Jaiñtia Hills da em 948 tylli ki skur wa da kheiñ hapoh ka MSPGI 2025-26 wei ki Top 20 wa Bottom 20 man ki kamni:
Ya ki Ranking ki skur ye phi wow pait heini https://ssa.megeducation.gov.in/MSPGI/MSRC_2025-26.
Discussion about this post