Ka Hynñiewtrep Integrated Territorial Organization (HITO) Central Body ha ka 22 tarik uni u bnai da pynkha paidbah ko ya HITO Hyderabad Unit, kawa man kawi na ki chnat krehkaam yong ka seiñ ka wow chakri ya ki khon Ynñiawtrep kiwa sah, wa kreh wei puræ ha Hyderabad wa ki thaaiñ wa marjan.
Ya kani ka chnat deilang ki dkhot da wan wow pynskem da kiwa yahkhmat ka HITO na Shillong kiwa kynthup ya u President Rangbah, u Donbok Dkhar, u Political cum Finance Secretary, u Gary S. Myrboh, u Deibormi Rymbai (CEC Leader) wa u Risingstar Marweiñ, Secretary ka HITO Southern Border Area.
Neiliang u Donbok Dkhar uwa da pskem ya kiwa kitkaam ka HITO Hyderabad Unit, da e u leh yei klam wa kyrpang deiwa ong wa kani ka Unit toh ka wow yarap para Ynñiawtrep kiwa em hapoh u pood u ang ka Hyderabad, khamtam kitu ki khynroo khyllood kiwa lai puræ wei kiwa da kreh kiwa jooh maad yei eh hawa em ki cha baar ka Bri U Ynñiawtrep.
Da ong u leh wa ka HITO Hyderabad Unit daw kreh wei paitbniah ko yei bha i miat yong ki para Ynñiawtrep, wow yada yei hok yong ki, u pynyatylli ya waroh ki jaitbru Ynñiawtrep, kiwa kynthup ya ki Khynriam, ki Pnar, ki Bhoi, ki War, ki Maram, ki Lyngam wa Diko khnang yow im deiwa yatylli wei yaraplang.
Kiwa kitkaam yong ka HITO Hyderabad Unit man ki kamni:
President: U Stephan Lamin
Secretary: U Marba Sawian
Organising Secretary: U Percy Rynjah
Finance Secretary: U Aibanjop Lyngdoh
Sports Secretary: U Batngen Diengdoh
Cultural Secretary: Ka Avita Marbaniang
Adviser: Ka Steffy Marbaniang
Da pynskem leh ya 80 ngut ki dkhot ki wow yabah yakit neibynta ka seiñ.
Ka HITO Central Body ka kitbok kitrwiang ko ya kiwa kitkaam wa thymme wei da kyrmen skem wow kreh chitom ki, kreh hok neibynta i bha i miat yong ki para Ynñiawtrep ym du kiwa em ha Hyderabad deilang kiwa em ha ki thaaiñ wa marjan.
Discussion about this post