Ka sorkar da kular ko du i ktien wow booh ya ka FCI Depot ha East Jaiñtia Hills District tangwa hadooh katni la chi snem tam ki paidbah yong ka District ym yoo ki ya ki dak ka chin iwa da wanrah leh yei eh i khor wow pynpoi biang por ya u khoo cha ki paidbah.
U Lektor Dkhar uwa paan RTI hawa klam cha kiwa pathai khubor ynne da ong u wa ha ka 27 tarik u May 2025, da e kti u yei kyrpaad cha u Montri Rangbah ka jylla wow kyrpaad ya ka sorkar u booh ya ka Food Corporation of India (FCI) Depot ha East Jaiñtia Hills District.
Da ong u wa ka sorkar da pdiang ko yeini i kyrpaad wei lyngba u Director of Food, Civil Supplies & Consumer Affairs, da phah u ya ka cha u General Manager, Food Corporation of India ha ka 2 tarik u June 2025 wow leh yeiwa emkaam.
Chooh chooh da ong u wa katni da palat chi snem, ki paidbah ka East Jaiñtia Hills ym pu yoh ki iwon iwon i pynbna paidbah hajrong ini i tyrwa wei ini i wiar ngeiñ da pynman i ya ki paidbah wow sñiawkhia wei wow kwah u tip yeiwa sakhiat.
Da ong u leh wa ini i dawa mih i nei emkaam yong waroh wow suk ki manyung wa em i duna hei yoh i laa, ki yoh yarap lyngba ka Public Distribution System (PDS), kiwa rep, kiwa kit mar, kiwa kamai kari wa kiwi.
U Lektor da kylli u iyi i man i long katni hajrong i tyrwa wa da phah ha u June 2025, kammon ka Food Corporation of India da e jubab ko namo ympu em cha ka sorkar Meghalaya wei lada dep jied ya i thaw wow booh ya ka FCI Depot ha East Jaiñtia Hills.
Discussion about this post