Ka 4-Mowkaiaw Civil Sub-Division Demand Committee haka 23 tarik uni u bnai da yoh ko wow yachem wa u Chief Minister ka jylla, u Conrad K. Sangma neibynta wow kyrpaad ya oo wow pynku kyrdan noh ya ka Laskein Block cha ka Civil Sub-Division.
Kamtæ hei yahkhmat u Deputy CM, u Sniawbhalang Dhar wa u MLA ka thaaiñ, u Nujorki Sungoh kam u President ka 4-Mowkaiaw Civil Sub-Division Demand Committee wa u Heirtami Suting kam u Secretary ka Committee, neiliang u Nujorki da pynsñiaw u yei eh i chon ki paidbah kiwa da maad da boon phaw tylli ki snem kattu neidaw wym pu em u pynku ya ka Laskein Block cha ka Civil Sub-Division.
Da khana u wa ka Laskein Block toh kawi na ki Block wa da rim tam kawa da wai mooyurim nadooh ka 11 tarik u October 1973 wei i em bru ko 90,402 ngut katkam ka Census 2011 iwa mut kattæ da nang boon bru chooh chooh ko.
U Sniawbhalang Dhar dei jooh ka thong da kyrpaad biang u ya u Chief Minister wow pynlait noh yei eh i khoo ki paidbah, da ong u wym suk dei i khmat u pait, ki chkoor u sñiaw yei eh i chon ki paidbah kiwa da maad da ki phaw tylli ki snem kattu.
Neiliang u Conrad hadien wa da yoh u sñiaw yei kyrpaad na u MLA ka thaaiñ wa na u Deputy CM, chisiendon da kohngooh u wei wa da kular u markhmat wow pynku kyrdan noh ya ka Laskein Block cha ka Civil Sub-Division wei da ong u leh wa neibynta ki kaam wa dang sah u kyrpaad u ya ki Office sorkar waphær waphær wow pynsmat khnang yuh yoh noh u booh mooyrim chisiendon wei u man ko leh ka Civil Sub-Division ka wow kreh kaam smat smat.
Kamtæ neiliang yong Nujor wa u Sniawbhalang da e khublei ki ya waroh ki kynhun waphær waphær nadooh ki synjuk ki waheh chnong wa ki seiñbhalang kiwa em hapoh ka Laskein Block deilang ka Jaiñtia Hills kiwa da kyrpaad ya ka sorkar neibynta kani ka jooh ka phang ha ki sngi ki por wa dadep hadooh wa da yoh u khait ya u soh wa thiang wa daw man noh i kyrkhu wa khroo ya ki paidbah ka thaaiñ.
Ha kani ka sngi da ya emlang nadooh ki MDC ka thaaiñ, u Aibor Shadap (12-Barato Constituency) wa u Wormanship Shadap (14-Mowkaiaw) deilang ki waheh ka thaaiñ nadooh u Eleazer C Dkhar, u Onyx Suchiang, u Firsting Lamare, u Ngaitsuk Suchiang, ka Auxialiadora Niang, u Laiwan Lamare, u Lalremruata Dkhar, u Kamdathmu Suchiang, u Nithiej Shadap, u Iahluti Dkhar, u Heipor Langbang, u Bhawan Chyrmang, u Riangmon Pastieh, u Khiat Lytep, u Mobing Sariang, u Heimon O Shadap, u Nidamon Chullet, u Chanky Lyngdoh, u Ardakirang Rymbai, u Heiplan Kamar, u Mon Biam, u Renew Shadap wa ka Evalari Lapasam.
Discussion about this post