Ka National People’s Youth Front Jowai Block chirup wa ka NPYF (Women’s Wing) ynnin ka 24 tarik da lai pynkup burom ki ya ka Ashwariya Malang kawa rah yei naam jop yong ka Miss Teen Diva 2026.
Kam wow pynkynmoo, ka Ashwariya Malang deiwa jop ya ka Miss Teen Diva 2026 daw yoh ko wow mihkhmat ya ka India ha ka Miss Teen Earth 2026.
Ha chwa wow sdang i pynkup burom ya ka Ashwariya da em ka yalang wa tbian wa pynlai da ka President ka NPYF Women’s Wing, ka Pynshai Laloo hapoh i yahkhmat u President ka NPYF Jowai Block, u Samehi Laloo.
U Samehi hawa klam tbian ha kani ka yalang da e u i yaroh ya ka Ashwariya wa dapoi ko ha kani ka thong, deiwa e mynsien chooh chooh u ya ka wow nang ku chooh ko ha ki liang waphær waphær wei lada em ko heiwon heiwon i bynta toh wow kynmoo ko ya u Blai.
Ha kani ka yalang da emlang u Secretary ka Jowai Block u Kmenlang Dhar, u Tremiki Sutnga, u William Paswet uwa man u Secretary ka NPYF District, u Yoobiang Bamon u Block Asst. Secretary ka NPYF, u Chatis Phawa wa kiwi.
Discussion about this post