Ka seiñ kiwa chet-ja sngi ha ki skur wa tip kam ka All Jaiñtia Mid-Day Meal Workers Union, ha ka yalang wa da pynman ki ynne ka sngi ha Yungwalieh ka Dorbar Chnong Loomiongkjam, da wan chimbynta da kiwa chet-ja na kylleiñ ka Ri-loom Jaiñtia heiwa da chim ki ya ka rai wa lada ka sorkar bei ym pynku ko ya ka bhah wa su ko cha kiwa chet-ja ha ki skur itæ na ka Rs. 900 chibnai cha ka Rs. 9000 chibnai, daw sangeh lai kreh noh ki wei ong ki leh toh u pynsangeh noh i krehkaam ka PM Poshan Scheme.
Dawa haroh ki wa neiwa jooh su iwa 10 bnai ha chisnem toh u su noh waroh 12 bnai, heijooh i por wow e yarap leh ya ki khon kiwa chet-ja skur khnang wow chngaaiñ ki.
Ini i maham yong ki toh hadien wa dadep e ki dei thoh cha ka sorkar India lyngba u Union Education Minister warim, u Dharmendra Pradhan, cha u prime Minister, u Narendra Modi wei khaddooh cha ka Nirmala Sitharaman, Minister ka chnat Finance heipor wa wan hiar ko cha Ri-loom Jaiñtia.
Uwa e buit ka seiñ, u K.L. Pariat ong u wa lada i dawa yong ki ym mankaam ki næ yoo ki dak iyi iyi ha i chong dorbar ka Lok Sabha wa Rajya Sabha, daw sangeh kreh noh ki, neibhah wa da i thoh wa da e ki cha u Prime Minister yow pynku ya ka bhah poisa wa jooh su kawa tip kam ka Honorarium nadooh u snem 2022.
Ha kani ka sngi neiliang u K.L. Pariat hawa klam da pynkynmoo haroh u kattu katni i jop nei yakhih ka seiñ, itæ nadooh wow pynpoi tulob hapoh Bank Account, i pynku ka sorkar jylla ya ka bhah yong ka na ka Rs. 100 cha ka Rs. 1100 wa kiwi kiwi dæ.
Ha kani ka sngi da pynche haroh u yei kaamram kiwa chet-ja sngi ha ki skur, kamjooh leh i emkaam wa toh u pynbiang ya ki, heiwa da khana haroh u wa u khoo wa jooh e cha ki skur toh uwa nongkong tam i miat wei hei wa ar won u khoo rachon.
Discussion about this post