Bia ki le ngut ki chipayu ya u jooh u bru uwa man kam u Cameraman ki

Ha iwi i jia wa pynchbot khlieh ya ki bru, ki le ngut ki kynthai kiwa chipayu kiwa na Amroha District ka Uttar Pradesh da bia ki ya u jooh u bru neidaw wym sñiaw ye mutdur ki u im jar jiar ki thaw hadien wa dep bia ki.

Kini ki chipayu toh ka Saroj (20), ka Savitri (19) wa ka Santosh (18) — wei man ki kam ki Social Media Content Creator kiwa na chnong Dhauriya, Hasanpur. Kini ki le ngut da bia ki pyn ya u Cameraman yong ki uwa tip kam ku Vikas ha Chamunda Mata Temple haka 17 tarik uni u bnai.

I Video yeini wa bia ki leh da poor ki Online iwa da wanrah yei beiñ na kiwa boon ki seiñ niam Hindu.

Ha kini ki Video da yoo ya u Vikas wa biah Sindoor u ha waroh le ngut kini ki chipayu heipor wa lehniam bia tangwa ym em won kiwon kiwon kiwa ha-yung ha-sem wa sakhi yeini.

Ka Saroj da ong ko wa kam ki chipayu da emlang bait ki chirup nadooh dang khian wei da khuslai ki hadien wa tip wa ka bei u pa ki da pynkhreh ki wow pynbia ki, kamtæ yow lait ki wow im jngai kawi na kawi hadooh wa da pyrkhat ki leh wow pynkut yei mynsien ki neibhah wym sñiaw ye mutdur ki wow im khlem da imlang wei yeini ye u leh lada bia ki ya uwi donhi u bru.

Related posts

E khublei ka NPYF-WJHD ya u Conrad Sangma

July 26, 2026

Haap uwi najrong yingkieñ cha ka wah Brahmaputra hawa chondur Selfie

July 26, 2026

Da khana ki leh wa u Vikas da kreh u kam u Cameraman ki la 6 bnai wei hawa chna parom ki ha ki Social Media jooh ak u kam u kurim.

U Vikas da ong u wa sñiawthooh u hadooh katwon yajan kini ki chipayu kamtæ da mynjur u yeiwa tyrwa bia neibhah da khana ki ya oo wym em kwah ki wow im jngai kawi na kawi.

Hadien wa joor beiñ ki bru, kini ki chipayu da pynmih ki ya iwi i Video yow klam yei parom ka niam Hindu deiwa ong wa u syiem Dasharatha em u le ngut ki kurim, kamtæ da ong wa ini wa leh ki ym em bakla i wei da chim rai ki dei mon wa laitlooid wei kam kiwa da heh.

Tangwa neiliang uwi u muktiar da ong u wa ini i bia ki ym ye wow tipmit da ka aiñ Hindu Marriage Act neibhah wym chah ya u chynrang wow bia u boon ngut ki kynthai.

Neiliang kiwa pynlai ya ka Chamunda Mata Temple da ong ki wym em pandit heipor wa bia kini neibhah wa dang em i kreh pynchna ya ka Temple.

Ki pulit leh da lai yaklam ki wa kini ki soo ngut hadien wa poor ini i Video tangwa ym em kawon kawon ka ujor pyrchah ya ini wa jia.