Ka Khasi Students’ Union (KSU) East Jaiñtia Hills District Unit da pynsñiaw ko yei pyrchah wa joor hajrong i thmu u wan ka karkhana ka Shree Cement wei wow tih moochuni ha Lum Syrman wa haap hapoh ka Elaka Nongkhlieh.
Katkam i pynbna ka Meghalaya State Pollution Control Board (MSPCB), ya ka Public Hearing daw pynman ha ka 31 tarik uni u bnai.
Neiliang u President ka KSU-EJHDU, u Streamly Suchen deilang ki dkhot ka seiñ ynne da lai yachem ki wa u Member Secretary ka MSPCB yow e kti ya ka dorkhat yow pynsñiaw yei pyrchah ya kani ka Public Hearing.
U Streamly hawa yaklam wa kiwa thoh khubor da ong wa da phylla leh wa yei por ka Public Hearing da pynkylla na ka 10:00 waje i step cha ka 8:00 waje i step wei ini i pynkylla da pynsuba ko wa em iyi ræ iyi cha kylla wei hap ki wow batai che.
Ka seiñ da kyrpaad ko leh ya ki bor pynlai ka District wow pyntikna wym em iwon iwon i khang i kah ya ka luti manda wan kiwa chimbynta kamwa da jia hei sien wa nyngong wa pynman ya kani ka Public Hearing.
Da ong u leh wa ka KSU-EJHDU daw hiar paidbah ko wow pyrchah joor yei wan ka Shree Cement wei ka seiñ u yieñ skem ko wym e laad ya kani ka Company wow pynkrehkaam ko ya ka Project ha kani ka thaaiñ.
Ka seiñ da lai ko leh wow yachem wa u DC deilang u SP ka East Jaiñtia Hills District ynne hi yow dawa na ki wow pyntikna wym em iwon iwon i chah pynthut chah khang kiwa lai chimbynta ha ka Public Hearing.
Discussion about this post