Ki kattu katni kiwa chong chnong ka Umlyngka ynne i step heipor kamwa 8:00 waje da chem ki yei metyap wa neh ha riat yong ka kchaaid Umtong kawa haap ha ka chnong Umlyngka dong Nonglum.
Katkam wa khana u Trekilad Lakiang uwa man kam u waheh chnong ka Umlyngka, da ong wa da em uwi u khynroo na ka dong Nonglum uwa da wiar ngeiñ nadooh ka 25 tarik uni u bnai wei da pynman leh yei thooh yong chnong ya uni u khynroo.
Da ong u wa hanla ym pu yoh u pait yei dur khmat uwa yap tangwa suba toh uwa wiar uwa tip kam u Wellbornstar Lyngdoh Nongbsap.
Neiliang ka chnong da pyntip ko cha ki pulit ka Jhalupara Out Post kiwa da wanpoi cha kani ka thaw kamjooh ki bru ka Forensic yow leh yeiwa emkaam.
Ki bru ka Search and Rescue Team (SRT) wa ki Fire and Emergency Services da wanpoi ki ha Umlyngka yow sai yei metyap heipor noh chariñ sngi wei i metyap kat ini i por da pær i ha sla um yong ka kchaaid Umtong.
Da pyntikna leh wa i metyap toh i yong u Willbornstar Lyngdoh Nongbsap (16 snem) uwa chong wa sah ha Umlyngka, Nonglum uwa da wiar nadooh ka 25 tarik.
Yei metyap da pyntikna leh da u pa u, u Birestar Nongsiej uwa da ong toh u khon yong oo, wei da khana u wa da mih u na yung heipor 3:00 waje i step ka 25 tarik wei nadooh katai ka sngi ym em de liwan yung u.
Da khana u leh wa u Willbornstar toh uwa em i duna hei bor pyrkhat wei dang mih u na Rehab Centre kattu dang chi bnai tam.
Discussion about this post