17 ngut wa kynthup deilang ya 4 ngut kiwa man kam ki Cabin Crew, da mynsoo ki hapoh ka lieñsuiñ ka Air India heipor wa hær na Phuket, Thailand cha Delhi ynnin ka sngi wei ini da jia i hadien wa noh syndet ka lieñsuiñ na 36,000 feet iwa toh u hær ko.
Kani ka lieñsuiñ toh ka Airbus A320neo, wei da kit ko 137 ngut ki bru deilang 3 ngut ki khonboo wa 8 ngut kiwa man kam ki Cabin Crew, wei da ye ki wow hiar ha Indira Gandhi International Airport, Delhi. Ya kani ka lieñsuiñ da khang wow hær ko da ka Directorate General of Civil Aviation (DGCA) hadooh wa dep u pynman yei takit.
Katkam wa pyntip ki heh ka DGCA, kawi na ki Crew Member da mynsoo joor ko hadien wa noh syndet kani ka lieñsuiñ kamwa 300 feet, wei kani ka lieñsuiñ leh em iwa sih ko deiwa jia ini.
Hawa hiar kani ka lieñsuiñ ha Delhi heipor kamwa 10:30 i step, da pynyang ya ki Ambulance yow kit ya kiwa mynsoo cha Medanta Medical Centre wa em ha Airport wei hadien won da kit cha Fortis Hospital ha Vasant Kunj wa sa cha kawi won neibynta uwa takha u budloom.
Yei daw wa jia ini waroh ym pu tip tikna wei da suba toh wa leh ka la’ær tangwa daw tip donhi hadien wa dep u pynman ya ka takit.
Kiwa chong hapoh da khana ki wa nyngkong u Pilot da mut wow hiar ha Lucknow tangwa hadien da rai wow lai bait cha Delhi neidaw wa biang ki thaw sumaar.
Na kiwa mynsoo, pyn ynnin da em 5 ngut kiwa da yoh u mih napoh thaw sumaar katwa ki 8 ngut ki Passenger wa ki soo ngut ki Cabin Crew da ksoh ki yow pait bniah.
Kiwa chong hapoh da khana ki wa heipor wa jia ini hawa noh syndet kani ka lieñsuiñ da man kamwa haap syndet heipor wa chong Lift heiwa ki tiar ki tar da hær ki kylleiñ kylleiñ wei da em leh ki thaw booh tiar kiwa wai wei da haap ki muna cha khyndaw.
Discussion about this post