I em kiwa thap Vote ha Meghalaya da hiar i na ka 23 lak tam cha ka 21 lak tam ha ka Draft Electoral Roll 2026 kawa da pynmih ynne ka sngi hadien wa ka jylla da pynkrehkaam ko ya ka Special Intensive Revision (SIR).
Ha kani ka Draft Electoral Roll, kiwa da chah pyndam pyrtuid da em ki 1.80 lak ngut katwa kiwa dang artatien wow psiah namo kiwa haap ha ka No Mapping iwa mut ki wym tip ya ki bei ki pa næ kiwa ha-yung ha-sem da em ki 2 lak tam, wei kini ye ki wow chah ah noh i pyrtuid kam kiwa thap Vote lada ym ye ki wow pynbiang ya ki kot ki sla wa sakhiat.
U Chief Electoral Officer ka jylla, u Dr. BDR Tiwari da ong u wa i em kiwa thap Vote toh 23,49,645 ngut chwa wow pynkrehkaam ya ka SIR katwa kiwa haap ha ka kyrdan ASDD (Absent, Shifted, Deceased and Duplicate) em ki 1,80,402 ngut wei ini mut i wa kiwa thap Vote da em ki 21,69,243 ngut.
Da em 7,75,665 ngut (33.01%) kiwa da ye u chemdien dei yong samen ki heiwa da em ki ya ki kot ki sla ki kam kiwa thap Vote nadooh wa leh ya ka SIR 2005 katwa 11,70,792 ngut toh kiwa da ye wow chemdien ki lyngba ki bei ki pa wa ki khon ki kti ki kamjooh ki tymmen katwa 2,22,786 ngut ki wym ye de wow pynyatoh wa ka SIR 2005 wei ya kini da booh hapoh ka kyrdan “No Mapping”, kiwa daw bichaar bniah heipor wa leh ya ka Claims wa Objections.
Na ki 1,80,402 ngut kiwa haap hapoh ka kyrdan Absent, Shifted, Deceased wa Duplicate (ASDD), kini kynthup ki ya 81,490 ngut kiwa da khlaad, 45,011 ngut ki wym em de chong chnong wei ym chem de. Da em 42,532 ngut kiwa da kyrriah chnong chawi wa 4,668 ngut kiwa da kyntait wow pdiang ya ka Enumeration Form (0.20%) wei da em 6,701 ngut kiwa em pyrtuid ar sien ha ka Electoral Roll.
Katkam ka Draft Electoral Roll wa thymme, ka Meghalaya kattæ em ko 21,69,243 ngut kiwa thap Vote, kiwa kynthup ya 10,53,039 ngut ki chynrang, 11,16,199 ngut ki kynthai wa 5 ngut ki Third Gender.
Discussion about this post