Ka Executive Committee yong ka JHADC hapoh i yahkhmat u CEM, u Thombor Shiwat, u Dy. CEM, u Lasky Rymbai deilang ki EM wa kynthup ya u Bisonroy Iano uwa pait leh ya ka yaaw ka haat, neitæ u Moonlight Pariat, u Hambertus Nongtdu, u Pheinshwa Nangleiñ, u Aiborlang Shadap chirup wa ki sahep ka Council da lai pait lai sylli ki ya ka Iawmusiang Complex ha Jowai wa mantre da ka JHADC wei pynkreh da ka chnat PWD heiwa i kreh da lai i chakhmat wei da jan dep hi kattu.
Heiyatoh wa ini i lai pait sylli, u CEM khana u wa i daw wa nyngkong hi toh wa phah chithi ka chnat sorkar yow pait thaw booh Transformer neibynta kani ka Complex, iwa ar won heiyatoh i paan thaw ka Seiñraij Jowai neibynta u pynneh ya u Mooknor wa em ha kani ka yaw.
Ha ini i hiar pait thaw neibynta kini ki ar tylli ki mat, u CEM pyntip u wa da pait syllilang haroh ki ya waroh soodong i rukom chna ya kani ka yaaw.
Heiyatoh i kær kynroh soodong kani ka yaaw, da chem ki wa dang boon ki thaw ka Council wa lait charood neiwa kær, wei ini jia i neidaw wym em yachem chwa ki wa ka Council yow pynyoo ko ya ki pood soodong.
Neibynta ini u CEM ong u wa daw rah yaklam hapoh ka EC wei daw pyrkhat iyi u leh ya kini ki thaw wa dang lait charood, lane boi daw yaklam wa u Contractor yow pynpra khnang wa waroh ki thaw ka Council u em ki chapoh ka kynroh.
Heiyatoh won wa i chna ya ki dukan namo ki Stall, u CEM ong u wa u Contractor da chna u katkam ka Plan Estimate wa pynkhreh da ka PWD Building, wei hei sakhiat la chna katkam i heh namo ka Size iwa man heipor wa tympra neiwa rim, ym em itæ i duna ki Stall.
Neibynta ini won ong u kamwa da chem wa dang boon ki thaw wa sawar wa kyllooid wei dang hoi u pynmih dukan, wei neiliang ka EC em ko i pyrkhat wa la kammon kammon neibynta u pynyoh thaw ya waroh kiwa yoh Permit napoh ka JHADC, daw chna pynmih dukan ha ki thaw wa lait wa sawar.
Wei yeini ye u leh hadien wa e kti ka PWD Building ya kani ka yaaw cha ka JHADC.
Discussion about this post