Ka JSM-Lapangap Unit da thoh ko cha u Deputy Chief Minister ka jylla, u Sniawbhalang Dhar ynne ka sngi heiyatoh wa i wan rep pyrchah aiñ wei wow pyrchah yei thmu booh Police Outpost da kawa pura da ki Karbi ha Lum Pynthor Lapangap.
Ka seiñ da dawa ko leh wow kyrriah noh ya ka Police Camp ka Meghalaya cha Lum Pynthor.
Neiliang ka seiñ da ong ko wa kam ka chnong ym em e bor næ mynjur ki wow chah ya ki Karbi u rep ki ha u Lum Pynthor neibhah ini i thaw toh iwa dang haap hapoh ka chnong Lapangap wei ini i wan rep ki Karbi da pyntieñ pynsier ki ya kiwa chong chnong lada ym em wa wan tuklar.
Da ong wa u Lum Pynthor Lapangap toh nadooh ki por yongrim em u hapoh ka chnong Lapangap wei ka sorkar toh u khang ko yeni i wan rep pyrchah aiñ deiwa kyrriah ya ka Police Camp ka Meghalaya cha u Lum Pynthor yow ye u yada deiwa miat yei thaw kiwa chong chnong.
Ka seiñ da ong ko leh wa da yoh khubor wa ki Karbi daw pyrchang ki wow booh ya ka Outpost wa man pura (Permanentha) ha Lum Pynthor Lapangap yow kam syndon ya ini i thaw.
Hajrong ini waroh ka seiñ deilang wa kiwa chong chnong da dawa ki na ka sorkar wow chimkhia deiwa khanglaad yeini wei wow kdaw che ka sorkar ya u pood. Lada ym leh yeini kiwa chong chnong daw pynbor ya ki wow pynman yakhih yow yada yei thaw wa da yoh pateiñ nadooh i por warim.
Neiliang u Sniawbhalang da kular u wow chimkhia yeini wa ka sorkar Assam.
Discussion about this post